طالبلرنینگ کابلدهگی امنیه قوماندانلیگی مطبوعات سۉزلاوچیسی خالد زدران نینگ ایتیشیچه، تۉرت کیشی «قوراللی اۉغری» طالبان کوچلری بیلن یوز بېرگن تۉقنهشووده هلاک بۉلگن.
او ایکس اجتماعي ترماغیده یازیشیچه، بوگون (دوشنبه،۱۹ اسد) اېرتهلب کابل شهری نینگ ۱۸-خوفسیزلیک ناحیهسیده قوراللنگن شخصلر اۉغریلیک قیلیش مقصدیده بیر اویگه کیرگن. طالبلر کوچلری واقعه جاییگه یېتیب کېلگچ، اولر بیلن آتیشمه یوز بېرگن.
زدراننینگ سۉزلریگه کۉره، اوشبو تۉقنهشوو نتیجهسیده تۉرت کیشی قوراللی اۉغری واقعه جاییده اۉلدیریلگن. شونینگدېک، اولردن ایکّی ته تۉپّانچه مصادره قیلینگنی ایتیلگن.
مذکور شخصلر و اولر نینگ قندهی شرایطده اۉلدیریلگنی حقیده مستقل منبعلر تامانیدن تصدیقلنگن ایشانچلی معلوماتلر موجود اېمس.
بوندن۱۰ کون آلدین هم طالبلر پولیسی کابل نینگ۸خوفسیزلیک ناحیهسیده اۉز کوچلری بیلن یوز بېرگن تۉقنهشووده یېتّی نفر قوراللی اۉغری اۉلدیریلگنینی معلوم قیلگن اېدی. اۉشه شخصلر نینگ کیملیگی حقیده هم معلومات بېریلمهگن.
طالبلر اوّل هم اۉغریلیکده عیبلنگن شخصلرنی بیر نېچه بار آتیب اۉلدیرگن. تنقیدچیلر بوندهی حرکتلرنی صحرا محکمه دېب بهالهیدی. شونینگدېک، اَیریم حاللرده طالبلرربېگناه فقرالر و اۉز مخالفلرینی «قوراللی اۉغری» صفتیده کۉرسهتیب، آتیب تشلهگنلیکده هم عیبلنیب کېلماقده.
