امریکا قۉشمه ایالتلری فدرال قیدیروو پولیسی یا افبیآی واشنگتن بۉلیمی افغانستان-امریکالیک وطنداشی محمودشاه حبیبي نینگ بېدرَک یۉقالگنیگه تۉرت ییل تۉلیشی مناسبتی بیلن اوشبو اداره اونی یقینلری بغریگه قَیتریش مجبوريتیگه صادق قالهیاتگنینی معلوم قیلدی.
حبیبي ۲۰۲۲-ییلده کابلدهگی اویی یقینیده بېدرَک یۉقالگن. افبیآی اونینگ تقدیری حقیده معلوماتگه اېگه بۉلگنلرنی مراجعت قیلیشگه چقیردی.
افبیآی واشنگتن بۉلیمینینگ تروریزمگه قرشی کورهش بۉییچه مخصوص اگېنتیمایکل بورگوالد شوندهی دېدی: « افبیآی محمودنی یقینلری بغریگه قَیتریشگه صادق قالماقده. جملهدن، اونینگ قیزی بیرینچی توغیلگن کونیدن بویان آتهسینی کۉرمهگن. اگر اونینگ قهیېرده سقلنهیاتگنی حقیده معلوماتینگیز بۉلسه، التماس، افبیآی بیلن باغلنینگ. بو ایشنی یکونلشیمیزگه یاردم بېرینگ. اوشبو عایله نینگ ینه بیرلشیشیگه یاردم بېرینگ.»
افبیآی بیاناتیده ایتیلیشیچه، حبیبي بېدرَک یۉقالگن پیتده کابلده جایلشگن «گروه مشاوره آسیا»، مخابرات شرکتیده مصلحتچی بۉلیب ایشلهگن.
او بوندن اوّل افغانستان ملی خدمت لر هوا یوللر ریاستی باشلیغی بۉلیب فعالیت یوریتگن.
افبیآی معلوماتیگه کۉره، ۲۰۲۲-ییل ۱۰-اگوست کونی طالبان استخبارات خدمتی حبیبي و اونینگ هیداوچیسینی موتردن توشیریب حبسگه آلگن همده اولرنی آسیا مصلحتچی گروه شرکتی نینگ ینه۲۹نفر خادیمی بیلن بیرگه قماققه آلگن.
حبسگه آلینگنیدن بویان حبیبي حقیده هېچ قندهی خبر یۉق. طالبان هم اونینگ حالتی یاکه قهیېرده سقلنهیاتگنی حقیده هېچ قندهی معلومات بېرمهگن.
۲۰۲۵-ییلده افبیآی واشنگتن بۉلیمی حبیبي نینگ بېدرَک یۉقالیشی یوزهسیدن آلیب باریلهیاتگن تېرگاو دایرهسیده اونینگ قیدیروو پلاکاتینی اعلان قیلگن اېدی.
امریکا دولت دیپارتمنتینینگ «پاداش برای عدالت» (عدالت اوچون مکافات) دستوری حبیبينی تاپیش، آزاد قیلیش و عایلهسیگه قَیتریلیشیگه یاردم بېرهدیگن معلومات اوچون پنج میلیون امریکا دالریگچه مکافات بېلگیلهگن.
