طالبلرنینگ عدلیه وزیری عبدالحکیم شرعي خیریه جمغرمهلری مسووللری بیلن اوچرهشووده اولردن یاردم ترقهتیش وقتیده محتاج انسانلرنی صورتگه آلمهسلیک و ویدیو تصویرگه توشیرمسلیکنی سۉرهدی.
طالبلر عدلیه وزیرلیگی بوگون (سهشنبه،۲۰ اسد) اعلان قیلگن بیاناتگه کۉره، شرعي تیناوون کابل و ولایتلرده فعالیت یوریتهیاتگن خیریه جمغرمهلری باشلیغلری بیلن اوچرهشگن.
بیاناتده ایتیلیشیچه، شرعي خیریه جمغرمهلری مسووللریگه «یاردم ترقهتیش چاغیده محتاجلرنی صورتگه آلیش و ویدیو تصویرگه توشیریشدن تيیلیش»نی توصیه قیلگن.
طالبلر عدلیه وزیرینینگ تأکیدلشیچه، بوندهی ایش «اولر نینگ قدر-قیمتی و شأنیگه پوتور یېتکزهدی».
شرعي ینه خیریه جمغرمهلری خلق نینگ قشّاقلیگیدن فایدهلنیب تجارت قیلمسلیگی، عکسینچه، همجهتلیکنی مستحکملش و اساسي اجتماعي لایحهلرنی عملگه آشیریش یۉلیده فعالیت یوریتیشی کېرهکلیگینی تأکیدلهگن.
بو بیرلشگن ملتلر تشکیلاتی و باشقه خلقارا تشکیلاتلر طالبلر افغانستانده حاکمیتنی قَیته اېگهلهگنیدن سۉنگ مملکتده قشّاقلیک و ایشسیزلیک کوچهیگنینی تأکیدلهیاتگن بیر پیتگه تۉغری کېلماقده. اولرنینگ معلوماتلریگه کۉره، جاري ییلده مملکت اهالیسینینگ قریب۲۳ میلیون نفری انسان پرورلیک یاردمگه محتاج.
خلق ارا انسان پرورلیک یاردم حجمی کمهییب بارهیاتگن بیر وقتده، خیریه جمغرمهلری و اَیریم اجتماعي ترماق فعاللری خارجدهگی خیریهچیلر بیلن یاردمگه محتاج عایلهلر اۉرتهسیده واسطهچیگه ایلنگن. کۉپ حاللرده اولر دونرلر و جماعتچیلیککه حسابات بېریش مقصدیده یاردم ترقهتیش جریانیده یاردم آلووچیلر نینگ صورت و ویدیولرینی آلیب، اولرنی اۉزلری نینگ اجتماعي ترماقلردهگی صحیفهلریده نشر قیلماقده.
