طالبلر مطبوعات سۉزلاوچیسی ذبیح الله مجاهد بو گروه افغانستان وطنداشی همده افغانستان سابق هوانوردلیک ریاستی نینگ باشلیغی محمودشاه حبیبی حقیده هیچ قندهی معلومات گه اېگه ایمسلیکلرینی بیلدیردی.
او ویدیو مراجعتیده محمود شاه حبیبي طالبلر حکومتی قۉلیده اېمسلیگینی ایتیب، مجاهدنینگ تأکیدلشیچه، اگر او طالبلر قۉلیده بۉلگنیده، «معما حل بۉلگن بۉلردی».
امریکا وطنداشلیگیگه هم اېگه بۉلگن حبیبي ۲۰۲۲-ییلده کابلدهگی اوییگه یقین جایده بېدرَک یۉقالگن. او کابلده جایلشگن بیر مخابراتی شرکتنینگ «آسیا مصلحت گروهی»ده مصلحتچی صفتیده ایشلهگن.
امریکا فدرال تېرگاو پولیسی یاکه افبیآی معلوم قیلیشیچه، ۲۰۲۲ییل ۱۰-اگوست کونی طالبلرنینگ استخبارات ریاستی حبیبي و اونینگ هیداوچیسینی موتردن حبسگه آلگن همده اولرنی «آسیا مصلحت گروهی» نینگ ینه۲۹نفر خادیمی بیلن بیرگه قماققه آلگن.
افبیآی تیناوون محمودشاه حبیبي نینگ بېدرَک یۉقالگنیگه تۉرت ییل تۉلگنی مناسبتی بیلن اوشبو تشکیلات محمودشاهنی یقینلری بغریگه قَیتریشگه همان قطعي بېل باغلگنینی بیلدیردی.
واشنگتندهگی افبیآینینگ تروریزمگه قرشی کورهش بۉلیمی اوچون مسوول مخصوص مامور مایکل بورگوالد شوندهی دېگن: «اف بی آی محمودنی یقینلری، جملهدن، توغیلگن کونی نینگ بیرینچی ییللیگیدن آلدین آتهسینی آخرگی مرته کۉرگن قیزی نینگ آلدیگه قَیتریشگه همان قطعي بېل باغلگن. اگر اونینگ قهیېرده سهقلنهیاتگنی حقیده معلوماتگه اېگه بۉلسنگیز، التماس، اف بی آی بیلن باغلنینگ. بو ایشنی یکونلشیمیزگه یاردم بېرینگ. بو عایله نینگ ینه بیرگه بۉلیشیگه یاردم بېرینگ.»
۲۰۲۵-ییلده واشنگتندهگی اف بی آی ادارهسی حبیبي نینگ بېدرَک یۉقالیشی بۉییچه آلیب بارهیاتگن تېرگاوی دایرهسیده اونینگ بېدرَک یۉقالگن شخص صفتیدهگی پوسترینی نشر قیلگن.
امریکا تشقی ایشلر وزیرلیگینینگ «عدالت اوچون مکافات» دستوری حبیبينی تاپیش، قوتقریش و امریکاگه قَیتریشگه آلیب کېلهدیگن معلومات اوچون 5 میلیون دالرگچه مکافات بېلگیلهگن.
