غور ولایتیدهگی منبعلر سابق خلق قۉزغلانی کوچلری اعضاسی بۉلگن و دولینه اولسواللیگیده اۉقیتووچی بۉلیب ایشلهگن بیر کیشی قوراللی شخصلر تامانیدن اۉلدیریلگنینی تصدیقلهدی.
منبعلرگه کۉره، بو شخص شهبازخان بۉلیب، بوگون (سهشنبه، ۲۰-اسد) توشدن آلدین دولینه اولسواللیگینینگ خرهسنگ منطقهسیده آتیب اۉلدیریلگن.
منبعلرنینگ ایتیشیچه، شهبازخان غور ولایتی کېنگشی نینگ سابق اعضاسی هاشم فیضي نینگ اوکهسی اېدی.
اولرنینگ تأکیدلشیچه، شهبازخان جمهوریت دوریده خلق قۉزغلانی کوچلری صفیده خدمت قیلگن، حاکمیت قولهگنیدن کېین اېسه خرهسنگ قیزلر مکتبیده اۉقیتووچی بۉلیب ایشلهگن.
بیر منبع نینگ معلوم قیلیشیچه، ساعت تخمیناً ۹:۰۰ ده موترسیکلده کېلگن ایکّی کیشی اۉزلرینی استخبارات خدمتی وکیللری صفتیده تنیشتیرگن.
منبعگه کۉره، اولر مکتبنی کۉزدن کېچیرگنیدن سۉنگ، خیرلشهیاتگن پیتده مکتب یانیده شهبازخانگه قرهته اۉق اوزگن و واقعه جاییدن قاچیب کېتگن.
حاضرچه قاتللیک نینگ سببی و اونی صادر اېتگن شخصلر نامعلوم. منبعلر شهبازخان نینگ هېچ کیم بیلن عداوتی بۉلمهگنینی اَیتماقده.
غوردهگی منبعلرگه کۉره، جمهوریت قولهگنیدن بیر ییل اۉتیب شهبازخان نینگ کویاوی فاروق هم سِرلی طرزده اۉلدیریلگن، اما اونینگ قاتللری هم حاضرگچه انیقلنمهگن.
