طالبلرنینگ بغلان ولایتی امنیه قوماندانلیگینینگ معلوم قیلیشیچه، اوشبو ولایت نینگ تاله و برفک اولسواللیگی اېکینچلیک سووی اوستیده ایکّی عایله اۉرتهسیده یوز بېرگن ماجرا عاقبتیده تۉرت کیشی اۉلدیریلگن و ینه بیر کیشی یرهلنگن.
قوماندانلیک بوگون (چهارشنبه، ۲۱ اسد) نشر قیلگن بیاناتیده حادثه اولسواللیکنینگ «دیوالک» منطقهسیده صادر بۉلگنینی بیلدیردی.
بیاناتگه کۉره، «دیوالک» منطقهسی مبایل علاقه ترماقلری قمراویدن تشقریده جایلشگن. شو سببلی محلي اهالیدن بیری باشقه منطقهگه باریب، واقعه تفصیلاتلرینی امنیه قوماندانلیگیگه یېتکزگن.
معلوماتلرگه کۉره، ایکّی عایله سوغاریش سوویدن فایدهلنیش مسألهسیده اۉزارا جنجللشگن. ماجرا نتیجهسیده تۉرت کیشی حیاتدن کۉز یومگن، ینه بیر کیشی تن جراحتی آلگن.
حاضرچه قربانلر نینگ شخصی همده قیشلاق دهقانلری اۉرتهسیدهگی اوشبو ماجرا نینگ انیق صادر بۉلگن وقتی حقیده قۉشیمچه معلومات بېریلمهگن.
بیرلشگن ملتلر تشکیلاتی بیلن همکارلیک قیلووچی انسان پرورلیک تشکیلاتلر سۉنگی ایکّی ییل دوامیده قورغاقچیلیک و قۉشنی دولتلردن مهاجرلرنینگ عامهوي قَیتیشی یانیده افغانستان قیشلاقلریده یېر و سوو اوستیدهگی نزاعلر کۉپهییشی ممکنلیگی حقیده بیر نېچه بار آگاهلنتیرگن.
