محلي منبعلرنینگ اۉقووچیلر و اۉقیتووچیلر آرهسیده بیلدیریشیچه، مزار شریفدهگی اۉغیل بالهلر مکتبلری باشلیغلری اۉقووچیلرگه طالبان حاکمیتی نینگ بېش ییللیگی مناسبتی بیلن اۉتکزیلهدیگن تدبیرده قتنهشیش مجبوري اېکنینی ایتگن. اولر نینگ تأکیدلشیچه، قتنهشمهگنلر جزالنیشی ممکن.
طالبلر کېلهسی شنبه (۲۴ اسد) گروهنینگ حاکمیتنی اېگهلهگنی نینگ بېش ییللیگینی نشانلشنی رېجهلشتیرماقده.
منبعلرگه کۉره، بلخ ولایتیدهگی طالبان مسووللری مکتب مدیرلریگه اۉقووچیلرنی آق بیراقلر بیلن مزار شریف کۉچهلریگه آلیب چیقیش بۉییچه تاپشیریق بېرگن.
بوگون (چهارشنبه،۲۱ اسد) مکتب مدیرلری اۉقووچیلرنی ۲۴ اسد کونی اۉتکزیلهدیگن تدبیرده اشتراک اېتیش مجبوريلیگی حقیده آگاهلنتیرگن.
اَیریم اۉقووچیلرنینگ ایتیشیچه، طالباننی قۉللب-قوّتلاوچی یوریشده قتنهشگنلرگه تشویقی نمره بېریلیشی، قتنهشمهگنلر اېسه ۱۰ کون درس قالدیرگن دېب حسابلنیشی ایتیلگن.
اۉقووچیلر نینگ سۉزلریگه کۉره، اۉقیتووچیلرگه هم طالباننی قۉللب-قوّتلش یوریشیده قتنهشیش بویوریلگن. عکس حالده، اولر آلتی کون ایشگه کېلمهگن دېب قید اېتیلیشی حقیده آگاهلنتیریلگن.
کېلهسی شنبه طالبان نینگ کابلنی اېگهللب، حاکمیتنی قۉلگه کیریتگنیگه بېش ییل تۉلهدی.
طالبان اوشبو کوننی عمومخلق دَم آلیش کونی دېب اعلان قیلگن.
