بیرلشگن ملتلر تشکیلاتینینگ افغانستاندهگی یاردم ادارهسی (یوناما) طالبلر حاکمیتگه قَیتگنی نینگ بېشینچی ییللیگی مناسبتی بیلن بېرگن بیاناتیده ایتیشیچه، عیاللر و قیزلرگه نسبتاً تاباره کوچهییب بارهیاتگن و ضررلی چېکلاولر همده تروریزم بیلن باغلیق دایمي خواطرلر افغانستان نینگ اوروشدن کېینگی تیکلنیش و ترقیات یۉلیدهگی حرکتلریگه تۉسقینلیک قیلماقده.
یوناما معلوماتلریگه کۉره، عیاللر و قیزلرگه نسبتاً چېکلاولر خلقارا همکارلیک و اینوېستیتسيهلرنی کېنگهیتیریش یۉلیدهگی اساسي تۉسیق بۉلیب قالماقده. تروریزم بیلن باغلیق خواطرلر اېسه افغانستان نینگ قۉشنی دولتلر و خلقارا همجمعیت بیلن مناسبتلرینی ینهده مرکّبلشتیرگن.
بیرلشگن ملتلر تشکیلاتی نینگ بوگون، پنجشنبه، ۲۲-اسد کونی اعلان قیلینگن بیاناتیده قید اېتیلیشیچه، طالبان حاکمیتگه کېلگنیدن بېش ییل اۉتیب، افغانستانده خوفسیزلیک حالتی یخشیلنگن دور کوزهتیلماقده. بیراق برقرارلیکنی مستحکملش اوچون طالبان مهم قدملر تشلشی کېرهک.
یوناما نینگ تأکیدلشیچه، جنگاور تۉقنهشوولر نینگ کمهییشی کۉپلب افغانلر اوچون سېزیلرلی فایده کېلتیردی همده تیکلنیش، رواجلنیش و منطقوي اقتصادي همکارلیککه اعتبار قرهتیش اوچون امکانیتلر یرهتدی. تشکیلات ایجابي چارهلر قطاریده کۉکناری یېتیشتیریشنی تعقیقلشنی هم قید اېتگن.
بیراق بیرلشگن ملتلر تشکیلاتی ادارهسی عیاللر و قیزلرگه نسبتاً تاباره کوچهییب بارهیاتگن و ضررلی چېکلاولر همده تروریزم بیلن باغلیق دایمي خواطرلر افغانستان نینگ اوروشدن کېینگی تیکلنیش و خلقارا همجمعیت قۉللب-قوّتلهیاتگن ترقیات سری حرکتیگه هنوز تۉسقینلیک قیلهیاتگنینی بیلدیرگن.
یوناماگه کۉره، خلقارا همجمعیت افغانستاننی اۉز خلقی و قۉشنیلری بیلن تینچ-تاتوو یشهیدیگن، خلقارا همجمعیتگه تۉلیق شکللنگن و خلقارا مجبوريتلریگه رعایه قیلهدیگن دولت صفتیده کۉریشنی ایستهیدی.
بیرلشگن ملتلر تشکیلاتی باش کاتبی نینگ مخصوص وکیلی اۉرینباسری و یوناما سرپرستی جورجیت گانیون شوندهی دېگن: «سۉنگگی بېش ییل شونی کۉرسهتدیکی، افغانلر اۉنلب ییللر دوام اېتگن اوروشلردن سۉنگ تینچلیک و برقرارلیکنی جوده قدرلهیدیلر».
او ینه شوندهی قۉشیمچه قیلگن: «اما برقرار تینچلیک و فراوانلیک فقط اوروش نینگ یۉقلیگی بیلن تأمینلنمهیدی. افغانستان نینگ کېلهجگی برچه افغانلر نینگ حقوقلری و صلاحیتی رۉیابگه چیقهدیگن، انستیتوتلر اېسه حسابدار و مسوولیتلی بۉلهدیگن جمعیتنی برپا اېتیشگه باغلیق».
جورجیت گانیوننینگ ایتیشیچه: «افغان خلقی، منطقه و خلقارا همجمعیت نینگ عمومي مقصدی انیق. بو مقصدگه یقینلشیش اوچون حاکمیت عیاللر و قیزلرگه نسبتاً چېکلاولرنی بېکار قیلیشی، اولر نینگ تعلیم، بندلیک و جماعت حیاتیده تۉلیق اشتراک اېتیشیگه امکان یرهتیشی، اساسي حقوق و اېرکینلیکلرنی حمایه قیلیشی همده خوفسیزلیک و تروریزم بیلن باغلیق خلقارا خواطرلرگه جواب بېریشی کېرهک. بولر خلقارا همجمعیت نینگ کوتیشلری و افغانستان نینگ اوزاق مدتلی برقرارلیگی همده فراوانلیگی اوچون ضرور بۉلگن اساسي سرمایهلردیر».
یونامانینگ تأکیدلشیچه، طالبان نینگ عیاللر و قیزلر حقوقلریگه نسبتاً قطعي چېکلاولری هنوز چوقور اجتماعي و اقتصادي ضرر کېلتیرماقده همده قیسقه و اوزاق مدتده افغانستان خلقیگه سلبي تأثیر کۉرستماقده.
طالبال عیاللر و قیزلرنی تعلیم آلیش، ایشلش و اېرکین حرکتلنیش حقوقلریدن محروم قیلگن. سۉنگگی بېش ییل دوامیده خلقارا تنقیدلرگه قرهمهی، طالبان اۉز چېکلاولرینی ینه-ده کوچهیتیرگن.
یوناماگه کۉره، بو چېکلاولر خلق ارا همکارلیک و اینوېستیتسيهلرنی کېنگهیتیریش یۉلیدهگی اساسي تۉسیق بۉلیب قالماقده.
بیرلشگن ملتلر تشکیلاتی ادارهسی تروریزم بیلن باغلیق خواطرلر افغانستان نینگ قۉشنی دولتلر و خلقارا همجمعیت بیلن مناسبتلرینی ینه-ده مرکّبلشتیرگنینی هم بیلدیرگن.
یوناما شوندهی دېگن: «افغانستان و منطقه دولتلری اۉرتهسیدهگی مهم علاقهلر اَیریم اقتصادي امکانیتلرنی یرهتگن بۉلسه-ده، برقرارلیکنی مستحکملش افغانستان، منطقه و اوندن تشقریدهگی اوزاق مدتلی برقرارلیککه تهدید سالهیاتگن تورلی خوفلرنی برطرف اېتیش اوچون خلقارا همجمعیت نینگ ینه-ده کېنگراق همکارلیگینی طلب قیلهدی».
یوناما خلقارا همجمعیت تمایللرگه اساسلنگن و عملي یاندشوودهگی همکارلیکنی دوام اېتتیریشگه چقیرگن. تشکیلاتگه کۉره، بوندهی همکارلیک افغان خلقی نینگ ایستکلرینی قۉللب-قوّتلشی و اوزاق مدتده وضعیتنی یخشیلش، افغانستاننی تیکلش همده اونی خلقارا همجمعیتگه قَیته انتیگراسیون قیلیشگه قرهتیلگن کېنگ قمراولی یاندشوونی ایلگری سوریشی کېرهک.
یوناما بیاناتیده ایتیلیشیچه، بیرلشگن ملتلر تشکیلاتی 2021-ییلدن بېری طالبان نینگ حاکمیتی بیلن ملاقاتنی دوام اېتتیریب کېلماقده همده انسان پرورلیک یاردم و اساسي خدمتلرنی تقدیم اېتیش آرقهلی افغانستان خلقینی قۉللب-قوّتلهماقده.
یوناماگه کۉره، بو سعی-حرکتلر معین درجهدهگی برقرارلیکنی یرهتیشگه یاردم بېرگن و انسان حقوقلریگه حرمت همده برچه افغانلر نینگ اشتراکیگه اساسلنگن حالده افغانستان نینگ خلقارا همجمعیتگه قَیته ادغام بۉلیش اوچون انیق یۉلنی بېلگیلب بېرگن.
