«ژورنالیستلرنی حمایه قیلیش کمیتهسی» طالبلر سۉنگّی بېش ییل دوامیده افغانستاننی ژورنالیستلر اوچون اخبارات ترقهتیش اېنگ قیین بۉلگن محیطلردن بیریگه ایلنتیرگنینی، کۉپلب ولایتلرده ژورنالیستلرگه ترافیک حادثهلری، ساغلیقنی سقلش و تعلیم کبی چېکلنگن موضوعلرده خبر بېریشگه رخصت اېتیلهیاتگنینی معلوم قیلدی.
ژورنالیستلرنی حمایه قیلیش کمیتهسی بوگون، جمعه کونی (۲۳ اسد)، افغانستان نینگ طالبلر تامانیدن اېگهللب آلینگنی نینگ بېشینچی ییللیگی مناسبتی بیلن نشر قیلگن بیاناتیده اوشبو گروهنی ژورنالیستلرگه نسبتاً کوچهییب بارهیاتگن باسیم و تعقیبلرنی تۉختهتیشگه چقیردی.
اوشبو خلقارا تشکیلات طالباندن «مطبوعاتگه، اینیقسه عیال ژورنالیستلرگه نسبتاً شفقتسیز باسیمنی تۉختهتیش و مستقل اخباراتگه کیریش امکانیتلرینی چېکلهیاتگن کېنگ قمراولی چېکلاولرنی بېکار قیلیش»نی سۉرهگن.
ژورنالیستلرنی حمایه قیلیش کمیتهسی نینگ افغانستان و پاکستان بۉییچه نمایندهسی ولیالله رحمانی افغانستان طالبلر تامانیدن اېگهللب آلینگنیدن بېری، سۉنگی بېش ییل ایچیده، مملکت «ژورنالیستلر اوچون خبر تیارلش جهتیدن دنیادهگی اېنگ قیین جایلردن بیریگه» ایلنگنینی ایتگن.
رحمانينینگ قۉشیمچه قیلیب: «طالبان نظارتی آستیده ژورنالیستلر حبسگه آلینیشی، کلتکلنیشی، سانسور یاکه دېپورتگه دچار بۉلماقده»، دېگن.
اونینگ ایتیشیچه، عیال ژورنالیستلر «ینه-ده کۉپراق کمسیتیش»گه دوچ کېلماقده و «آدملر تاباره کۉپراق گپیریشدن قۉرقماقده».
کمیته نمایندهسی نینگ تأکیدلشیچه، اینترنت و مبایل علاقه بۉییچه چېکلاولر «مطبوعات اېرکینلیگی بحرانی»نی ینه-ده چوقورلشتیریب، طالبلرنینگ افغانستان اخبارات مکانی اوستیدن نظارتینی مستحکملهگن.
تشکیلات طالبان تامانیدن ژورنالیستلر نینگ حبسگه آلینیشی، زورانلیککه اوچرهشی، قماققه تشلنیشی و عامهوي اخبارات واسطهلری نینگ فعالیتی تۉسیب قۉییلگن بیر قطار حالتلرگه اشاره قیلیب، چېکلاولر و نظارت ژورنالیستلر فعالیتیده سانسور و اۉزینی اۉزی سانسور قیلیش محیطینی شکللنتیرگنینی بیلدیرگن.
ژورنالیستلرنی حمایه قیلیش کمیتهسی مستقل ژورنالیستنی باستیریش طالبان نظارتی آستیدهگی کېنگ قمراولی اخبارات تیزیمینی یرهتیش آرقهلی عملگه آشیریلهیاتگنینی ایتگن. تشکیلاتگه بیر نېچه ولایتدن مراجعت قیلگن ژورنالیستلرنینگ بیلدیریشیچه، «مضمونلی خبرلر» شو قدَر چېکلنگنکی، ترافیک حادثهلری، ساغلیقنی سقلش و تعلیم کبی موضوعلردن تشقری باشقه واقعهلرنی یاریتیش امکانیتی قالمهگن.
ژورنالیستلرنی قۉللب-قوّتلاوچی اوشبو تشکیلاتنینگ ایتیشیچه، سۉنگّی ییللرده طالبلز کابل و افغانستان نینگ تورلی ولایتلریده اۉنلب مستقل یېتکرمه فعالیتینی تۉختهتگن. افغانستان مستقل عامهوي اخبارات واسطهلری نینگ یۉق قیلینیشی یوزلب ژورنالیستلرنینگ منطقه دولتلریگه باشپناه ایزلب کېتیشیگه سبب بۉلگن.
کمیتهنینگ تأکیدلشیچه، اۉزباشیمچهلیک بیلن حبسگه آلینیشی و طالبان نینگ قصاصیدن قۉرقیب مملکتنی ترک اېتگن ژورنالیستلر قۉشنی دولتلرده هم خوفسیز اېمس. اولر دایمي روشده مجبوري قَیتریب یوباریلیش و طالبلرنینگ تعقیبیگه اوچرهش خوفی آستیده قالماقده.
بو آرهده ژورنالیستلر و عامهوي اخبارات واسطهلرینی قۉللب-قوّتلاوچی باشقه تشکیلاتلر هم افغانستانده ژورنالیستیکه احوالی یامانلشهیاتگنیدن خواطر بیلدیرگن.
افغانستان ژورنالیستلر مرکزی کېچه مملکتده سۉنگّی۱۲ آی دوامیده ژورنالیستلر و یېتکرمهلر حقوق همده اېرکینلیکلری نینگ۱۰۰ دن آرتیق بوزیلیش حالتینی قید اېتگنینی معلوم قیلدی.
اوشبو تشکیلاتنینگ ایتیشیچه، تشقی کۉرینیشده ژورنالیستلر و یېتکرمه حقوقلرینینگ بوزیلیشی حالتلری سانی اۉتگن ییلگه نسبتاً کمهیگندېک کۉرینسه-ده، اصلیده اخبارات محیطی ینهده تارهیگنی سببلی ژورنالیستلر و یېتکرمهلر وکیللری حتا اۉز حقوق و اېرکینلیکلرینینگ بوزیلیشی حالتلرینی هم خبر قیله آلمهیپتی.
