کنر و نورستان ولایتلریدهگی محلي منبعلر طالبلر اوشبو ایکّی ولایتدهگی مسجد اماملرینی طالبلرنینگ حاکمیتگه قَیتیشینینگ اهمیتی حقیده وعظ قیلیشگه مجبور قیلگنینی اَیتماقده.
منبعلر بوگون، جمعه کونی (۲۳ اسد)، «اطلاعات روز» گزیتهسیگه معلوم قیلیشیچه، محلي طالبلر عملدارلری مسجد اماملرینی بو بویروققه بۉیسونمسلیکدن آگاهلنتیرگن.
خوفسیزلیک نقطهٔ نظریدن شخصی آشکار قیلینمهگن منبعلرگه کۉره، کنر و نورستاندهگی مسجد اماملری بوگونگی خطبهلریده «طالبان نینگ افغانستان اوستیدن قَیته حکمرانلیک اۉرنهتیشی نینگ اهمیتی» حقیده گپیریب، افغانستان جمهوریت توزومی نینگ اغدریلگنیگه بېش ییل تۉلگنینی «نشانلهگن».
منبعلر بو ایش «باسیم آستیده» عملگه آشیریلگنینی تأکیدلهماقده. چونکه طالبلر، اگر بیرار مسجد امامی اوشبو گروهنینگ حاکمیتگه قَیتیشی نینگ اهمیتی حقیده وعظ قیلمسه، «مسجددن چیقریب یوباریلیشی» حقیده آگاهلنتیرگن.
بیراق طالبلر حاضرچه اۉزی نینگ محلي عملدارلری مسجد اماملرینی بویورتمه قیلینگن وعظلرنی قیلیشگه مجبورلهگنینی تصدیقلهمهگن.
اېرتهگه، شنبه کونی ( ۲۴اسد)، «افغانستان اسلام جمهوریتی» توزومی اغدریلگنی و طالبلرنینگ مملکتده قَیته حاکمیتگه کېلگنیگه بېش ییل تۉلهدی.
طالبلر بو ییل اوّلگی تۉرت ییلگه قرهگنده کابلگه کیریب کېلگنی نینگ ییللیگینی نشانلش اوچون یېتکرمه و جمعیت مقیاسیده ینهده کېنگراق ترغیبات کمپاینی آلیب بارماقده. سۉنگگی بیر هفته ایچیده مملکت شهرلری و عمومی قتناو یۉللرده طالبلر بیراقلری همده ترغیبات بنرلری هر قچانگیدن کۉپراق کۉزگه تشلنماقده.
