افغانستاننینگ بیرلشگن ملتلر تشکیلاتی انسان حقوقلری کېنگشیدهگی نمایندهسی نصیر احمد اندیشه، طالبلر بیلن همکارلیک قیلیش بو گروهگه اولرنینگ انسان حقوقلرینی بوزیش و ترورچیلیک فعالیتی بیلن باغلیق اۉتمیشی مذاکره قیلینیشی ممکن بۉلگن مسأله دېگن توشونچهنی سینگدیریشینی ایتدی.
نصیر احمد اندیشه اوشبو فکرلرینی بوگون جمعه کونی (۲۳-اسد)، «جست سکیوریتی» وب-سایتیده نشر قیلینگن مقالهسیده بیلدیرگن.
او شوندهی دېدی: «هر سفر بیرار دولت طالبلر بیلن همکارلیکنی تجاري کېلیشوو صفتیده کۉرسه، بو طالبانگه اولرنینگ انسان حقوقلری و تروریزم بیلن باغلیق اۉتمیشی مذاکره قیلینیشی ممکن دېگن توشونچهنی بېرهدی.»
اندیشه «بوندهی حالتگه هېچ قچان یۉل قۉییلمسلیگی کېرهک»، دېیه تأکیدلهدی.
او طالبلر حلی هم دولتلرنی بو گروهنی تن آلیشگه ایشانتیره آلمهگنی همده افغانستاننینگ بیرلشگن ملتلر تشکیلاتیدهگی اۉرنی حلی طالبلر قۉلیگه اۉتمهگنینی افغانستان خلقی اوچون امکانیت دېب حسابلشینی ایتدی.
اندیشه نینگ سۉزلریگه کۉره، افغانستان نینگ بیرلشگن ملتلر تشکیلاتیدهگی اۉرنی نینگ طالبلردن مستقل وکیل تامانیدن سقلب قالینیشی فقرالیک کوچلری، عیاللر و طالبانگه مخالف گروهلرگه خلقارا میدانلرده افغانستان آوازینی طالبلر نظارتیدن تشقریگه یېتکزیش اوچون مهم امکانیت یرهتگن.
طالبلرنینگ افغانستانده حاکمیتنی قَیته اېگهللهگنی نینگ بېش ییللیگی عرفهسیده غرب نینگ طالبان بیلن مناسبتلرنی باشلهگنی مسألهسی تاباره کۉپراق اعتبار مرکزیگه توشماقده.
منطقه دولتلری دستلبدن اۉز خوفسیزلیگی و منفعتلرینی تأمینلش مقصدیده طالبان بیلن سیاسي و اقتصادي علاقهلر اۉرنهتیشگه حرکت قیلیب کېلگن. بیراق سۉنگگی ایکّی ییل ایچیده اَیریم اروپا دولتلری هم مهاجرلرنی افغانستانگه چیقریب یوباریش اوچون طالبان بیلن علاقهلر اۉرنهتیشگه اورینماقده.
جملهدن، آلمان طالبلرنینگ ایکّی وکیلینی برلیندهگی افغانستان اېلچیخانهسی و بن دهگی مملکت قنسوللیگیگه قبول قیلدی. اروپا کمیسیونی اېسه طالبان هیئتینی بروکسلگه چقیردی.
