طالبلر افغانستانده حاکمیتنی اېگهلهگنی نینگ بېشینچی ییللیگی مناسبتی بیلن یۉلهگن پیامیده برچه دولتلر بیلن تینچ مناسبتلرنی رواجلنتیریشنی ایستشینی معلوم قیلدی.
طالبلر سۉزلاوچیسینینگ اۉرینباسری حمدالله فطرت بوگون (شنبه،۲۴ اسد) طالبلرنینگ رسمي بیاناتینی اعلان قیلدی. اونده جمهوریت توزومی اغدریلگنی و اوشبو گروه کوچلرینینگ کابل گه کیرگنی ییللیگی «فتح ییللیگی» دېب اتهلگن.
طالبلر دنیا بیلن تینچ-تاتوو یشش سیاستینی آلیب بارهیاتگنینی دعوا قیلگن.
طالبلر بیاناتیده: «افغانستان دنیا نینگ برچه دولتلری بیلن تینچلیک و آسایشتهلیک محیطیده یششنی ایستهیدی»، – دېییلهدی.
گروه، شونینگدېک، «هېچ کیمگه افغانستان توپراغیدن باشقه بیر دولتگه قرشی فایدهلنیشگه یۉل قۉیمسلیگینی و باشقه دولتلردن هم افغانستانگه قرشی هر قندهی فتنه-ده اشتراک اېتمسلیکنی، حدودیمیز، حاکمیت و منفعتلریمیزنی حرمت قیلیشنی سۉرهشینی» بیلدیرگن.
بو بیانات طالبان سۉنگی بېش ییل دوامیده قۉشنی دولتلر، جملهدن پاکستان، اېران، تاجیکستان و اۉزبېکستان بیلن تورلی تۉقنهشوولرگه دوچ کېلگنی همده تورلی «ترورچی گروهلر»گه باشپناه بېرگنلیکده عیبلنهیاتگن بیر پیتده ینگرهدی.
طالبلر و پاکستان اۉرتهسیدهگی تۉقنهشوولر اۉتگن ییلدن بویان بیر نېچه باسقیچده و وقتی-وقتی بیلن دوام اېتیب کېلماقده. حاضرگچه چېگره حدودلریدهگی وضعیت تۉلیق نارمهللشمهگن. شونینگدېک، ۲۰۲۲-ییلده افغانستان حدودیدن اۉزبېکستانگه قرهته اۉق اوزیلگن، 2023-ییلده طالبان کوچلری نیمروز ولایتیده اېران چېگرهچیلری بیلن تۉقنهشگن. ۲۰۲۲-ییل می و ۲۰۲۵-ییل دسامبر آیلریده اېسه طالبان کوچلری تاجیکستان کوچلری بیلن تۉقنهشگن.
پاکستان طالبلرنی پاکستان طالبان حرکتی (تی تی پی) رهبرلرینی افغانستانده باشپناه بیلن تأمینلشده و اوشبو گروه جنگریلریگه حربي تیارگرلیک اۉتش همده پاکستان حکومتیگه قرشی هجوملرنی رېجهلشتیریش اوچون امکانیت یرهتیشده عیبلهیدی.
