»افغانستان آزادلیگی جبههسی» جمهوریت توزومی قولهگنی و طالبلر افغانستانده قَیته حاکمیتنی اېگهلهگنی نینگ بېشینچی ییللیگی مناسبتی بیلن بېرگن بیاناتیده، بو گروه فقط حاکمیتنی زۉراورلیک بیلن اېگهللشگه موفق بۉلگنینی، اما مملکتنی باشقریش اوچون سیاسي مشروعیت گه اېگه بۉله آلمهگنینی ایتدی.
اوشبو جبهه بوگون (شنبه،۲۴ اسد) اعلان قیلگن بیاناتیده طالبلر افغانستاننی چوقور سیاسي باشی بېرک کۉچهگه آلیب کیرگنینی یازگن.
«افغانستان آزادلیگی جبههسی»: «طالبلر حاکمیتنی زۉراورلیک بیلن اېگهللشگه موفق بۉلدی، اما سیاسي مشروعیت و باشقروو نینگ اساسي معماسینی حل قیله آلمهدی»، – دېب ایتگن.
جبههنینگ قۉشیمچه قیلیشیچه، طالبلرنینگ بېش ییللیک حکمرانلیگی افغانستان خلقی، منطقه و خلقارا همجميعتگه وضعیتگه انیق بها بېریش اوچون یېترلی امکانیت یرهتگن.
جبهه نینگ ایتیشیچه، «طالبلر حدود اوستیدن نظارت اۉرنهتیب، دولت نینگ برچه واسطهلرینی اېگهللب آلگنیگه قرهمهی، کوچگه اساسلنگن حکمرانلیکنی قانوني، برقرار سیاسي تیزیمگه ایلنتیره آلمهگنی» عیان بۉلگن.
«افغانستان آزادلیگی جبههسی» طالبلرنینگ افغانستان عیاللریگه مناسبتینی «اوشبو گروه ماهیتینی بهالش نینگ اېنگ یقّال مېزانی» دېب اتهگن. جبهه افغانستان عیاللر اشتراکیسیز اجتماعي خوفسیزلیک، انسان کپیتهلی، ساغلام مالیوي تیزیم، ایشانچی همده منطقه و جهان اقتصادیاتی بیلن نارمل علاقهلرگه اېگه بۉله آلمهسلیگی و برقرار رواجلنیشگه اېریشه آلمهسلیگینی تأکیدلهگن.
