افغانستان ملي اسلامي حزبی رهبری مارشال عبدالرشید دوستم طالبان نینگ حاکمیتگه قَیتگنی نینگ بېشینچی ییللیگی عرفهسیده اوشبو گروه حکومتینی «ناقانوني» دېب اتهدی. او طالبلر سۉنگی بېش ییل دوامیده کېنگ کۉلملی چېکلاولر جاري اېتیب، عیاللر و افغانستان فقرالری نینگ حقوقلرینی بوزگنینی تأکیدلهدی.
دوستم بیاناتیده قیزلر نینگ آلتینچی صنفدن یوقاری تعلیم آلیشینی تعقیقلش، عیاللر نینگ ایشلشی و فعالیت یوریتیشیگه چېکلاو قۉییش، سابق حکومت کوچلرینی حبسگه آلیش و قییناققه سالیش، عامهوي اخبارات واسطهلرینی باستیریش، اېتنیک و دیني کمسیتیش، مجبوري کۉچیریش، شونینگدېک، قمچیلش و قتل کبی جزالرنی قۉللش طالبان حکمرانلیگی دوریده خلق دوچ کېلگن معمالردن اېکنینی ایتدی.
افغانستان ملي اسلامي حزبی رهبری طالبان بېش ییل اۉتگنیگه قرهمهی، ایچکی و خلقارا مشروعیت گه اېگه بۉله آلمهگنینی بیلدیردی. اونینگ ایتیشیچه، بو گروه تورلی تشکیلاتلر نینگ قرهشلرینی قبول قیلیشگه و مثبت ملاقاتگه کیریشیشگه تیار اېمس.
دوستم، شونینگدېک، افغانستانده قوراللی گروهلر، جملهدن، «القاعده» موجودلیگیدن خواطر بیلدیرگن. اونینگ تأکیدلشیچه، بوندهی گروهلر نینگ طالبلر حکمرانلیگی آستیده فعالیت یوریتیشی قۉشنی دولتلر و منطقه اوچون تهدید توغدیریشی ممکن.
او بیرلشگن ملتلر تشکیلاتی و افغانستان مسألهسیگه علاقهدار دولتلر، خصوصاً، امریکانی طالبانگه نسبتاً مالیوي باسیم و سیاسي باسیمنی کوچهیتیریشگه، اوشبو گروهگه تۉغریدن-تۉغری مالی یاردم بېریشنی تۉختهتیشگه چقیردی. دوستم افغانستانده اېرکین و اساسی قانونگه اساسلنگن دولت برپا اېتیش اوچون ملي و خلقارا ملاقات همده سیلنهدیگن حکومت توزیش اوچون شرایط یرهتیش ضرورلیگینی تأکیدلهدی. اونینگ ایتیشیچه، بو یۉل بیلن افغانستان خلقی قشّاقلیک، بېقرارلیک و او «طالبلر ظلمی و وحشيلیگی» دېب اتهگن حالتلردن خلاص بۉلیشی ممکن.
