بیرلشگن ملتلر تشکیلاتینینگ انسانپرورلیک یاردملرنی موافقلشتیریش اداره (اوچا) نینگ معلوم قیلیشیچه، جاري ییلده افغانستانده طبيعي آفتلر ۹۲مینگ کیشیگه تأثیر کۉرسهتگن. اولردن ۹۷نفری جان بېرگن ینه ۳۳۱ کیشی یرهلنگن.
اوچا بوگون (یکشنبه، ۲۵-اسد) اعلان قیلگن گزارشیده سۉنگّی یېتّی آی دوامیده افغانستانده زلزله، سوو تاشقینی و کۉچکی کبی طبيعي آفتلر کۉپلب انسانلرنینگ حیاتیگه ضامن بۉلگنینی بیلدیرگن.
اوچا گزارشیگه کۉره، ۲۰۲۶-ییل جنورییدن اگستیگچه افغانستان نینگ ۳۴ولایتیدهگی ۲۰۲ ته اولسواللیگیده ۱۳ مینگ عایله، جمعی ۹۲ مینگ کیشی طبيعي آفتلردن ضرر کۉرگن. طبيعي آفتلردن جبرلنگن ۹۲ مینگ کیشی نینگ ۵۱ مینگ کیشیسی مملکت شرقي زونیدهگی ولایتلر اهالیسی حسابلنهدی.
بو دورده ۹۷ کیشی هلاک بۉلگن، ۳۳۱کیشی جراحتلنگن،۱۰ مینگته اوی ضرر کۉرگن و۲ مینگ ۱۰۰ ته اوی ویران بۉلگن.
اوچانینگ تأکیدلشیچه، بو رقملر آرتیده اوی-جاییدن اَیریلگن عایلهلر، قیشلاق خۉجهلیگی یېرلری سوو تاشقینلری عاقبتیده ضرر کۉرگن دهقانلر همده یۉللر، سوغاریش تیزیملری، سوو ترماقلری و محلي بازارلری ضرر کۉرگن جماعهلر توریبدی.
تشکیلات نینگ خواطر بیلدیریشیچه، اوّلدن تیریکچیلیک امکانیتلری چېکلنگن عایلهلر اوچون اوی-جای یاکه درآمد کېلتیرووچی مال-ملکدن اَیریلیش اولرنی ینه-ده ضعیف حالتگه توشیریب، انسانپرورلیک یاردمگه قرهملیگینی آشیریشی ممکن.
تورلی یۉنهلیشلرده انسانپرورلک یاردمگه احتیاج آرتیب بارهیاتگن بیر پیتده، افغانستاندهگی انسانپرورلیک خدمت لایحهلریگه مالیوي کۉمک سېزیلرلی درجهده کم. بیرلشگن ملتلر تشکیلاتی جاري ییلده افغانستاندهگی انسانپرورلیک وضعیتنی یخشیلش اوچون سۉرهگن ۱.۷میلیارد دالرلیک مبلغ نینگ ییل نینگ بیرینچی یرمیده ۲۰ فایزیدن، یعنی بېشدن بیر قِسمیدن هم کمینی آلگن.
