منبعلر قندهارده سابق حکومت دوریده خدمت قیلگن، عبدالرزاق اچکزیگه یقین شخص بۉلگن سابق حربي خدمتچی پاکستاننینگ کویته شهریده اۉلدیریلگنینی معلوم قیلدی.
منبعلرگه کۉره، بو سابق حربي حاجی ورور اچکزی بۉلیب، او اوّلگی حکومت دوریده قندهار شهری نینگ ایکّینچی خوفسیزلیک حوزه آمری لوازمیده ایشلهگن.
منبعلرنینگ ایتیشیچه، حاجی ورور اچکزی جمهوریت حکومتی اغدریلگنیدن سۉنگ طالباندن قۉرقیب کویته شهریگه کۉچیب اۉتگن و شو یېرده یشب کېلگن.
منبعلرگه کۉره، او بوگون (یکشنبه، 25-اسد) اېرتهلب کویته شهریدهگی اویینینگ یقینیده موترسیکلده کېلگن قوراللنگن شخصلر تامانیدن اۉققه توتیلیب، هلاک بۉلگن.
حاضرچه اونینگ اۉلدیریلیش سببی و قاتللیکنی صادر اېتگن شخصلر کیم اېکنی نامعلوم.
منبعلر حاجی ورور اچکزی قندهار نینگ سابق پولیس قوماندانی، جنرال عبدالرزاق اچکزیگه یقین شخصلردن بیری بۉلگنینی اَیتماقده.
طالبلر حکمرانلیگینینگ بېش ییلی دوامیده، گروه رهبرینینگ عمومي عفو اعلان قیلگنیگه قرهمهی، سابق حربي خدمتچیلرنینگ مملکت ایچیده اۉلدیریلیشی دوام اېتیب کېلماقده.
طالبلر تنقیدچیلری بو گروهنی سابق حربي خدمتچیلرگه قرشی قصاصکارانه قاتللیکلرده عیبلهیدی. بیراق طالبلر بو عیبلاولرنی رد اېتیب، گروه جنگریلری ملا هبتالله نینگ بویروقلریگه بۉیسونیشینی تأکیدلهیدی.
