پاکستان چېگرهسی یاپیق بۉلیشیگه قرهمهی، خلق ارا انسانپرورلیک یاردم آرتیلگن ۷۰۰دن آرتیق یوک موتری پاکستان آرقهلی افغانستانگه کیرگن.
بیرلشگن ملتلر تشکیلاتینینگ افغانستاندهگی انسانپرورلیک مسألهلرنی موافقلشتیریش اداره (اوچا) سۉزلاوچیسی اولگا چروکو فرانسه خبرگرارلیگیگه بېرگن معلوماتیده اوشبو کاروان «آزیق -آوقت و باشقه مهم انسانپرورلیک یاردم یوکلری»نی آلیب کېلگنینی ایتگن.
بیرلشگن ملتلر تشکیلاتینینگ پاکستاندهگی نمایندهسی و انسانپرورلیک مسألهلر بۉییچه کوریناتوری مو یحیی ایکس اجتماعي ترماغیدهگی صحیفهسیده: «۷۲۴ته انسانپرورلیک یوک آرتیلگن یوک موتری تورخم آرقهلی افغانستانگه کیریب، یاردمگه اېنگ محتاج عایلهلرگه یېتکزیلدی»، دېب یازگن.
او، شونینگدېک، اسلام آبادگه و «اوشبو حیاتي مهم انسانپرورلیک یۉلکنی آچیق سقلش امکانینی بېرگن برچه تامانلرگه» منّتدارلیک بیلدیرگن.
طالبان و پاکستان اۉرتهسیدهگی ماجرا ۲۰۲۵-ییل اکتوبریدن بویان ایکّی دولت اۉرتهسیدهگی قوروقلیک چېگرهسی نینگ دېیرلی تۉلیق یاپیلیشیگه آلیب کېلیب، انسانپرورلیک یاردم یېتکزیب بېریش یۉللرینی جدّي ایزدن چیقرگن.
پاکستان چېگرهسی یاپیلگچ، انسانپرورلیک یاردملر ایرانگه آلیب اۉتیلهیاتگن اېدی. بیراق هرمز بۉغازینینگ یاپیلیشی و ایران همده امریکا اۉرتهسیدهگی اوروش سببلی بو یۉنهلیش هم تۉسیلیب قالدی.
شونگه قرهمهی، پاکستان افغانستان بیلن سودانی تۉختهتگن بۉلسه-ده، انسانپرورلیک یاردملرنی افغانستانگه ترانزیت آرقهلی آلیب اۉتیشگه رخصت بېرگن.
جهان آزیق-طعام دستوری اوّلراق افغانستان و پاکستان چېگرهلری همده هرمز بۉغازی یاپیلگنی سببلی ۴۰۰تُن آزیق مادّهلر بیلن باییتیلگن بیسکویت 15 مینگ کیلومتر یۉل باسیب، تۉقّیز دولت حدودیدن اۉتگن حالده افغانستانگه یېتیب کېلگنینی معلوم قیلگن.
جهان آزیق – آوقت یاردملرنی افغانستانگه یېتکزیش یۉلی تاباره اوزاق و مرکّب بۉلیب بارهیاتگنینی بیلدیرگن.
اوشبو تشکیلات حساباتیده آگاهلنتیریلیشیچه، افغانستان و پاکستان چېگرهلری نینگ یاپیلیشی دوام اېتسه و یقین شرقدهگی بحران ینه-ده کوچهیسه، افغانستانده ینه ۲.۳میلیون کیشی آزیق-آوقت خوفسیزلیگی معماسیگه دوچ کېلیشی ممکن.
جهان آزیق –آوقت دستوری اگست آیی نینگ باشیده افغانستانده بالهلر اۉرتهسیدهگی اۉتکیر تۉییب طعاملنمسلیک درجهسی جاري ییلده بحرانلی باسقیچگه یېتگنیدن آگاهلنتیرگن.
تشکیلات معلوماتلریگه کۉره، اۉتگن ییلگی هلاکتلی زلزلهلر، جاري ییلدهگی بیر قطار آغیر اقلیم حادثهلری همده۲۰۲۳ییلدن بویان ایران و پاکستاندن میلیونلب افغانلر نینگ قَیتیشی عاقبتیده قریب ۱۴ میلیون افغان اۉتکیر آچلیک بیلن یوزمه-یوز کېلماقده.
