افغانستانلیک بیر گروه مدنی فعاللری، صنعتکارلر و یشاوچیلر امریکا پایتختی واشنگتن شهریده طالبلرنینگ حاکمیتگه قَیتگنی نینگ بېش ییللیگی مناسبتی بیلن ناراضیلیک نمایشی اۉتکزدیلر.
نمایشچیلر افغانستان عیاللری و قیزلرینی قۉللب-قوّتلب، «تعلیم، ایش و اېرکینلیک» شعارینی ایتدیلر همده افغانستاندهگی «جنسی آپارتاید» تۉختهتیشنی طلب قیلدیلر.
اولر خلق ارا همجعیت دن افغانستان عیاللری و قیزلرینی اونوتمسلیگی کېرهکلیگینی تأکیدلهدیلر.
نمایشچیلر خلق ارا همجعیتدن عیاللرگه نسبتاً چېکلاو و کمسیتیشلرنی «جنسی آپارتاید» صفتیده جدّي بهالشنی همده اونگه برهم بېریش اوچون انیق، موافقلشتیریلگن و اۉلچب بۉلهدیگن چارهلر کۉریشنی سۉرهدیلر.
اولر حکومتلر و خلقارا تشکیلاتلر عیاللر و قیزلر نینگ اساسي حقوقلرینی تیزیملی روشده بوزهیاتگن رژیمنی نارمللشتیریش یاکه اونگه قانونيلیک بېریش جریانیده اشتراک اېتمسلیگی کېرهکلیگینی تأکیدلهدیلر.
نمایشچیلر فکریچه، طالبان بیلن هر قندهی علاقه انیق انسان حقوقلری مېزانلری و عیاللر همده قیزلرنینگ حقوقلرینی کفالتلش طلبلری بیلن بیرگه آلیب باریلیشی کېرهک.
نمایش اشتراکچیلری، شونینگدېک، خلقارا همجمعیتدن یېرلرنی تارتیب آلیش و مجبورن اېگهللش، اهالینی کۉچیریش همده اَیریم اېتنیک گروهلرنی تیزیملی روشده سیقیب چیقریشگه قرشی جدّي چارهلر کۉریشنی طلب قیلدیلر. اولر انسان حقوقلری بوزیلیشلرینی مستقل روشده حجتلشتیریش و مانیتارینگ قیلیش میکانیزملری یرهتیلیشی، عیبدارلر اېسه جوابگرلیککه تارتیلیشی کېرهکلیگینی تأکیدلهدیلر.
تدبیرده «هر بیر عیال نینگ اۉز حکایهسی بار» کمپاین دوامیده تۉپلنگن امضالر و قۉللب-قوّتلاو خبرلری نمایش اېتیلدی.
مذکور کمپاین «عیال» کتابی مؤلفی زهرا یگانه نینگ تشبثی بیلن ۲۴-جونده باشلنگن و ۱۵-اگستگچه دوام اېتگن.
کمپاین دوامیده دنیا نینگ تورلی مملکتلریدن افغانستان عیاللری و قیزلرینی قۉللب-قوّتلش مقصدیده یېتی مینگته امضا و بېش مینگته بیردملیک پیامی تۉپلنگن.
