طالبلر «ملي رادیو تلویزیونی» خادملرینی آگاهلنتیریب، اگر کیم نینگ سقالی بیر قبضهدن قیسقه بۉلسه، «تعزیر» قیلینیشینی بیلدیرگن.
«اطلاعات روز» گزېتهسی قۉلیگه توشگن ملي رادیو و تلویزیونی ریاستی دعوت و ارشاد بۉلیمی نینگ مکتوبیده ایتیلیشیچه، قیافهسی و تشقی کۉرینیشی شریعتگه ضد بۉلگن خادملرنینگ معاشی تۉختهتیلهدی، لوازمی تۉختهتیلهدی، مرتبهسی پسهیتیریلهدی یاکه ایشدن بۉشهتیلهدی.
مکتوبده طالبان رهبری بویروغیگه اساسن برچه خادملرگه نماز اۉقیش اۉرگهتیلیشی، شونینگدېک، «اهلی سنن عقیدهسی و اطاعت نینگ تیزیم مستحکملیگیدهگی تأثیری» کتابی منتظم روشده اۉقیتیلیشی ایتیلگن.
ملي رادیو و تلویزیونی ریاستی دعوت و ارشاد بۉلیمی خادملرگه سقال و ساچلرینی شریعت طلبلریگه موافق سقلشنی بویورگن. سقالی بیر قبضهدن قیسقه بۉلگنلر «تعزیر»گه تارتیلیشی ایتیلگن.
اوشبو بۉلیم برچه خادملر باشیگه دۉپّی کيیب یوریشی، جماعت بیلن نماز اۉقیش وقتیده اېسه سلّه اۉرهش مجبوري اېکنینی بیلدیرگن.
ملي رادیو و تلویزیونی خادملریگه نمازنی جماعتدن تشقریده اۉقیگنلر هم «تعزیر» قیلینیشی حقیده آگاهلنتیریلگن.
دولت ادارهلریدن بیریده ایشلهیدیگن منبع «اطلاعات روز»گه طالبلرنینگ خادملرگه نسبتاً باسیمی کوچهیگنینی ایتگن.
حاضرده بو قاعدهلر طالبلر نظارتیدهگی برچه دولت ادارهلریده جاري اېتیلماقده.
طالبلرنینگ «امر به معروف و نهي از منکر» خادملری آدملرنینگ کيینیشیگه هم نظارت اۉرنهتگن. اولر کيینیش ترتیبی و سقال قۉیمسلیک سببلی کۉپلب کیشیلرنی بیر نېچه بار حبسگه آلگن.
