بیرلشگن ملتلر تشکیلاتینینگ افغانستاندهگی یاردم ادارهسی (یوناما) غربي کابلدهگی بیر مکتبده یوز بېرگن پارتلش عاقبتیده۹ یاشدن ۱۴ یاشگچه بۉلگن۴۲باله یرهلنگنینی تصدیقلهدی.
یوناما بوگون کېچقورون (سهشنبه،۲۷ اسد) بېرگن بیاناتیده یرهلنگن بالهلر و اولر نینگ عایلهلریگه همدردلیک بیلدیرگن همده حادثه نینگ قندهی صادر بۉلگنیگه آیدینلیک کیریتیش اوچون اونی هر تامانلهمه تېکشیریشگه چقیرگن.
بو اداره: «مکتبلر و تعلیم مرکزلری بالهلر اوچون خوفسیز جای بۉلیشی و هر قندهی زۉراورلیک همده ضرردن حمایهلنگن بۉلیشی کېرهک»، دېب تأکیدلهگن.
تیناوون (دوشنبه،۲۶ اسد) ساعت تخمیناً۴:۳۰ده کابل شهرینینگ ۱۸خوفسیزلیک ناحیهسیگه قرهشلی دشت برچی حدودیدهگی مهديه شهرچهسیده جایلشگن خصوصي «شمع هدایت» مکتبی حویلیسیده پارتلش صادر بۉلگن.
اوشبو پارتلشده اۉنلب بالهلر جراحتلنگن.۳۵ نفر یرهدار ایمرجنسی شفاخانهسیگه، ینه۱۷ نفری برچیدهگی خصوصي شفاخانهگه آلیب کېتیلگن. تیناوون یرهلنگنلرنینگ عمومي سانی۵۲نفر دېب خبر قیلینگن. یرهلنگن بالهلر آرهسیده قیزلر هم، اۉغیل بالهلر هم بار.
پارتلش قندهی صادر بۉلگنی حقیده قرهمه-قرشی معلوماتلر موجود.
محلي منبع کېچه «اطلاعات روز» گزیتهسیگه بېرگن معلوماتیده اۉقووچیلر صنفلردن چیقیب کېتگن پیتده مکتب مقابلسیدهگی کۉچهدن اونینگ حویلیسیگه قۉل نارنجکی آتیلگنینی ایتگن.
طالبلر نینگ کابلدهگی امنیه قوماندانلیگی سۉزلاوچیسی خالد زدران پارتلشنی تصدیقلب، حادثه قۉل بۉمبی نینگ آتیلیشی عاقبتیده یوز بېرگنینی بیلدیرگن.
طالبلر سۉزلاوچیسی ذبیحالله مجاهد هم پارتلشنی «قۉل بۉمبی بیلن قیلینگن هجوم» دېب تعریفلب، حادثه نینگ قندهی یوز بېرگنینی انیقلش، شونینگدېک، هجومچیلرنی انیقلش و حبسگه آلیش بۉییچه تېکشیروولر دوام اېتهیاتگنینی ایتگن.
اما طالبلرگه یقین عامهوي اخبارات واسطهلری و بی بی سی کېچهگی پارتلش اۉقووچیلردن بیری نینگ یانیده بۉلگن پارتلاوچی مادّهلر سببلی یوز بېرگنی حقیده خبر بېرگن. اوشبو خبرلرگه کۉره، پارتلاوچی مادّه اوروشدن قالیب کېتگن بۉلیب، اونی اۉقووچیلردن بیری مکتب اطرافیدهگی تېپهلیکلردن تاپگن بۉلیشی ممکن.
تأکیدلش جایزکی، کابلنینگ هزارهلر استقامت قیلهدیگن غربي حدودیده مکتبلر و تعلیم مرکزلری بیر نېچه بار قانلی هجوملرگه اوچرهگن. اوشبو هجوملرنینگ اکثریتی اوچون جوابگرلیکنی «اسلامي دولت» (داعش) گروهی اۉز ذمّهسیگه آلگن.
