طالبلرنینگ یوقاری مرتبهلی عملدارلری افغانستان مستقللیگی مناسبتی بیلن کابلده اۉتکزیلگن ییغیلیشده اۉز حکومتیگه قرشی «توزوم»، «فتنه» و «ایزدن چیقریش» حرکتلری حقیده گپیردی.
طالبلر اوردوسی باشلیغی فصیحالدین فطرت خارجدهگی بو گروه مخالفلری «طالبلر امیرلیگیگه قرشی فتنه اویوشتیرهیاتگنینی»، بیراق اولر طالبلر حکومتیگه قرشی جدّي چقیریق یرهته آلمهسلیگینی ایتدی.
او طالبلر مخالفلرینی «فتنه اویوشتیریش» اۉرنیگه افغانستانگه قَیتیشگه چقیریب، بو گروهنینگ «بغری آچیق» و «عفو اېتیش دایرهسی کېنگ» اېکنینی تأکیدلهدی.
فطرت مخالفلر، اونینگ ایتیشیچه، «خطا قیلیشسه»، «جدّي و کېسکین» مناسبتگه دوچ کېلیشیدن آگاهلنتیردی.
طالبلر ایچکی ایشلر وزیری سراجالدین حقّاني هم بو گروه کوچلری «ایزدن چیقرووچیلر»نی باستیریشگه قادر اېکنینی ایتدی. اونینگ تأکیدلشیچه، بو «ایزدن چیقرووچیلر» خارجلیکلرنینگ گیجگیجلاوی بیلن افغانستاندهگی خوفسیزلیکنی ایزدن چیقریشگه اورینماقده.
حقّاني طالبلر مخالفلریگه «خارجلیکلر نینگ گیجگیجلاوی بیلن خلقنی بېزاوته قیلیش نه افغانلیککه خاص، نه اسلام طلبی دیر»، دېیه مصلحت بېردی.
طالبلر تشقی ایشلر وزیری امیرخان متقي هم بو گروه کوچلری «دشمن» فتنهلرینی حلی باشیدناق برطرف اېتگنینی ایتدی.
اونینگ سۉزلریگه کۉره، طالبان مخالفلری سۉنگگی بېش ییل ایچیده بیر قریچ هم حدودنی اېگهلهی آلمهگن.
طالبلر سۉنگگی بېش ییل دوامیده اۉز مخالفلرینینگ فعالیتی و موجودلیگینی انکار قیلیب کېلگن. بیراق سۉنگگی پیتلرده مخالف گروهلرنینگ حرکتلری کوچهیگن.
سۉنگگی هفتهلرده بدخشانده ینگی تشکیل اېتیلگن بیر جبهه بیر تومن مرکزینی بیر نېچه ساعت دوامیده طالبان نظارتیدن چیقریب قۉیدی.
«افغانستان آزادلیک جبههسی» هم یقینده بدخشانده طالبان بیلن هجوم و تۉقنهشوولر صادر بۉلهیاتگنی حقیده بیر نېچه بار خبر بېردی.
امریکاده بۉلگن سابق اوردو قوماندانی سمیع سادات باشچیلیگیدهگی «افغانستان بیرلشگن جبههسی» یقینده طالبلرگه قرشی حربي فعالیتگه اۉتگنینی و بو گروه کوچلرینی نشانگه آلهیاتگنینی معلوم قیلدی.
سابق باميان واليسی طاهیر زهیر تامانیدن توزیلگنی ایتیلهیاتگن «جمهوریت جبههسی» هم طالبلرگه قرشی هجوملری حقیده خبر بېرماقده.
شونگه قرهمهی، طالبلر مخالفلری حاضرگچه بو گروه اوچون جدّي معما توغدیره آلمهگن.
