افغانستاننینگ بیرلشگن ملتلر تشکیلاتیدهگی نمایندهلیگی سرپرستی نصیر احمد فایق،۲۸ اسد افغانستان مستقللیگی ییللیگی مناسبتی بیلن مستقللیکنی نشانلش افغان خلقی برچه اساسي حقوق و اېرکینلیکلریدن فایدهلنگندهگینه حقیقي معنا و مضمونگه اېگه بۉلیشینی ایتدی.
او ایکسدهگی صحیفهسیده شوندهی یازگن: «بیراولکهنینگ مستقللیگی اونینگ خلقی آزاد بۉلمهسه، تۉلیق مستقللیک اېمس».
۲۸اسد افغانستان مستقللیگی کونی صفتیده بېلگیلنگن. بوندن۱۰۷ییل اوّل، ۱۲۹۸-ییل۲۸ اسدده افغانستان نینگ اۉشه پیتدهگی پادشاهی اماناللهخان بریتانيا بیلن راولپیندی شرطنامهسینی امضالب، مملکت مستقللیگینی اعلان قیلگن.
شوندن بویان۲۸ اسد افغانستان مستقللیگی کونی صفتیده نشانلب کېلینهدی. طالبلر هم سۉنگگی بېش ییل دوامیده بو کوننی نشانلب کېلماقده.
افغانستان نینگ اوّلگی حکومتیدن قالگن یگانه عملدار بۉلگن فایق شوندهی یازگن: «مملکت مستقللیگینی نشانلش افغانستان خلقی و برچه یشاوچیلر، اینیقسه عیاللر و قیزلر برچه اساسي حقوق و اېرکینلیکلردن، جملهدن تعلیم آلیش و ایشلش حقوقیدن فایدهلنیش امکانیگه اېگه بۉلگندهگینه حقیقي معنا و مضمونگه اېگه بۉلهدی؛ برچه یشاوچیلرنینگ سیاسي، مدنی، اجتماعي و اقتصادي حقوقلری قانون دایرهسیده، قانوني و حسابدار تیزیم تامانیدن حرمت قیلینیشی و کفالتلنیشی؛ خلق اېسه مملکت تقدیری و کېلهجگی حقیدهگی قرارلرنی قبول قیلیشده اېرکین و مضمونلی روشده اشتراک اېته آلیشی کېرهک».
طالبلر سۉنگگی بېش ییل دوامیده یشاوچیلرنینگ حقوق و اېرکینلیکلریگه نسبتاً کېسکین چېکلاولر جاري قیلدی. حاضرده عیاللر و قیزلر تعلیم آلیش و ایشلش حقوقیدن محروم اېتیلگن.
فایق شوندهی دېگن: «مستقللیک فقط خارجي حکمرانلیکدن خلاص بۉلیش اېمس؛ حقیقي مستقللیک خلق ارادهسی حرمت قیلینگنده، انسان قدر-قیمتی حمایهلنگنده و هېچ بیر یشاوچی جنسی، ملتی، تیلی، دینی یاکه سیاسي قرهشلری سببلی اۉزی نینگ اساسي حقوقلریدن محروم قیلینمهگندهگینه قرار تاپهدی. عکس حالده، مستقللیک حقیدهگی مضمونسیز شعارلر آزادلیک، حقوقلر و خلق ارادهسی حاکمیتی نینگ اۉرنینی باسه آلمهیدی».
