منبعلرنینگ بادغیس ولایتیدن خبر بېریشیچه، طالبلر استخبارات کوچلری ولایت مرکزیده ایکّی کیشینی آتیب اۉلدیرگن.
طالبلرنینگ بادغیسدهگی امنیه قوماندانلیگی سۉزلاوچیسی صدیقالله صدیقی ایکّی کیشینینگ اۉلدیریلگنینی تصدیقلب، اولرنی «یاووزلیک و بوزغونچیلیک گروهی» اعضالری دېب اتهگن.
او «اطلاعات روز» گزیتهسیگه یوبارگن پیامیده ایتیشیچه، بو ایکّی کیشی بوگون (چهارشنبه،۲۸ اسد) ساعت تخمیناً۴:۰۰ده قلعه نو شهرینینگ اوچینچی خوفسیزلیک ناحیهسیدهگی «قادرس بندر» حدودیده طالبان نظارت-اۉتکزیش قرارگاهده قۉل بۉمبی اولاقتیریشگه اورینگن پیتده اوشبو گروه کوچلری تامانیدن نشانگه آلینگن.
طالبلر قوراللی مخالفلرینی «یاووزلیک و بوزغونچیلیک گروهی» دېب اتهیدی. حاضرچه هلاک بۉلگنلرنینگ شخصی انیقلنمهگن.
«اطلاعات روز» طالبلر امنیه قوماندانلیگی سۉزلاوچیسینینگ دعواسینی مستقل روشده تصدیقلهی آلمهیدی.
محلي منبعلردن بیری هم «اطلاعات روز» گزیتهسیگه یوبارگن پیامیده طالبلر استخبارات کوچلری ایکّی کیشینی آتیب اۉلدیرگنینی ایتگن. منبعنینگ تأکیدلشیچه، هلاک بۉلگنلرنینگ شخصی و نیمه ایش بیلن شغللنگنی اونگه معلوم اېمس.
طالبلر یقینده کابلده۱۰ دن آرتیق کیشینی آتیب اۉلدیرگن و اولرنی اۉغریلر بۉلگن همده تۉقنهشووده هلاک بۉلگن دېب بیلدیرگن اېدی. بیراق بو شخصلرنینگ قندهی شرایطده اۉلدیریلگنی حقیده انیق معلوماتلر حاضرگچه نفوذلی عامهوي اخبارات واسطهلریده اعلان قیلینمهگن.
