بیر ایشانچلی منبع «اطلاعات روز» گزیتهسیگه بېرگن معلوماتیده طالبلرنینگ عالي تحصیلات وزیرلیگی خصوصي «خاتمالنبیین» بیلیم یورتی ینگی باشلیغی و اۉرین باسلرینی تعیینلهگنی همده بیلیم یورتنی اۉز نظارتیگه آلگنینی ایتدی.
منبع نینگ سۉزلریگه کۉره، طالبلر عالي تحصیلات وزیرلیگی کابل طبیات بیلیم یورتینینگ سابق باشلیغی «مفتی اسدالله نجات»نی «خاتمالنبیین» بیلیم یورتینینگ ینگی باشلیغی اېتیب تعیینلهگن.
«خاتمالنبیین» بیلیم یورتی افغانستاندهگی نفوذلی خصوصي بیلیم یورتلردن بیری بۉلیب، افغانستان شیعه جماعهسیگه تېگیشلی حسابلنهدی.
«تمدن» تلویزیونی باشلیغی جواد محسنی و افغانستان سابق پارلمانی اعضاسی عبدالقیوم سجادي اوشبو بیلیم یورت نینگ ملکدارلری قطاریگه کیرهدی.
طالبلر بوندن بیر مدت آلدین «تمدن» تلویزیونی و «خاتمالنبیین» مدرسهسینی هم مصادره قیلگن اېدی. طالبلرعدلیه وزیرلیگی اوشبو مېدیا تشکیلاتی و دینی مدرسه جایلشگن یېرلر نینگ ناقانوني اېگهللنگنینی معلوم قیلگن.
شخصینی آشکار قیلیشنی ایستهمهگن منبع بوگون «اطلاعات روز» گزیتهسیگه «خاتمالنبیین» بیلیم یورتی جایلشگن یېر یوزهسیدن هېچ قندهی دعوا بۉلمهگنینی ایتدی.
منبعنینگ سۉزلریگه کۉره، طالبلر عدلیه وزیرلیگی قندهاردهگی گروه رهبری دفتریگه یوبارگن مکتوبیده «خاتمالنبیین» بیلیم یورتی شیعه تشکیلاتی اېکنی و اونده سنّی مذهبیگه منسوب خادملر یۉقلیگینی بیلدیرگن.
منبعنینگ قۉشیمچه قیلیشیچه، طالبلر عدلیه وزیرلیگینینگ اوشبو مکتوبیدن سۉنگ گروهنینگ عالي تحصیلات وزیرلیگی «خاتمالنبیین» بیلیم یورتینی اۉز نظارتیگه آلیشگه کیریشگن.
منبع نینگ ایتیشیچه، اوشبو وزیرلیک بوندن اوّل یونیورسیتی طلبهلری اۉقیتووچیلرینی حنفی مذهبیگه همده طالبلر قانونلریگه رعایه قیلیش مجبوريتینی آلگن بیان نامه نی امضالشگه مجبورلهگن.
طالبلر دولت بیلیم یورتلریگه اۉز جنگریلرینی باشلیغی اېتیب تعیینلهگن.
اوشبو گروه سۉنگّی بېش ییل دوامیده خصوصي بیلیم یورتلر رهبرلرینی تعیینلش جریانیگه ارهلشمهگن اېدی.
منبع طالبلر عالي تحصیلات وزیرلیگی خصوصي «کاتب» بیلیم یورتنی هم اۉز تصرفیگه آلیشی ممکن لیگینی ایتدی.
