سرپلدهگی بیر منبعنینگ ایتیشیچه، طالبلرنینگ سۉزمهقلعه اولسواللیگیدهگی بیر اعضاسی ایکّی آی آلدین نکاحیگه آلگن 18 یاشلی قیزنی آتیب اۉلدیرگن. سرپلدهگی طالبلر امنیه قوماندانلیگی سۉزلاوچیسی عیالنینگ اۉلیمینی تصدیقلهگن، بیراق او عایلهوي زۉراورلیک سبب اۉز جانیگه قصد قیلگنینی ایتگن.
خلق ایچیدهگی منبع «اطلاعات روز» گزیتهسیگه یوبارگن پیامیده بو یاش قیز اصلی گوسفندی اولسوالیگیدن اېکنینی و ایکّی آی اوّل طالبلرنینگ بیر اعضاسی تامانیدن «اۉغیرلب کېتیلیب»، سۉزمهقلعهگه آلیب کېلینگنینی ایتدی. منبعگه کۉره، اوشبو طالبلر اعضاسی قیزنی «مجبوري روشده» نکاحیگه آلگن.
منبع اوشبو طالبلر اعضاسینینگ اسمی حسن اېکنینی ایتیب، اونینگ ینه بیر خاتینی بارلیگینی بیلدیردی. منبعگه کۉره، حسن کېچه (جمعه،۳۰ اسد) آغزهکی جنجلدن سۉنگ خاتینینی اۉلدیرگن.
ینه بیر منبع نینگ ایتیشیچه، حسن «سنگري» تخلصی بیلن سۉزمهقلعه تومنیدهگی طالبلر حاکمی نینگ قۉریقچیسی بۉلیب ایشلهیدی.
ایکّینچی منبع هم حسن نینگ خاتینی اۉلدیریلگنینی تصدیقلهدی، بیراق قاتللیکنی کیم صادر اېتگنی انیق اېمسلیگینی ایتدی.
منبعنینگ سۉزلریگه کۉره، حسن خاتینی اۉز جانیگه قصد قیلگنینی دعوا قیلگن، بیراق شفاکارلر اۉق آرقه تاماندن تېککنینی ایتگن. شو سببلی اونینگ اۉز جانیگه قصد قیلگنی حقیدهگی دعواسی حقیقتگه تۉغری کېلمهیدی.
اوشبو منبع طالبان اعضاسی بیلن قاتل نینگ نکاحی قندهی شرایطده توزیلگنی حقیدهگی سوالگه جوابن، قیز «احتمال» اۉغیرلب کېتیلگن بۉلیشی ممکنلیگینی ایتدی.
منبع شوندهی دېدی: «مېنده بار معلومات شوکی، قیز گوسفندی تومنیدن. بیر کونی کېچهسی شو طالبان اعضاسی قیزنی اۉز قیشلاغیدهگی اوییگه آلیب کېلگن. بو حالت آدملر آرهسیده آشکار بۉلگنیدن سۉنگ، اېرتهلب بیر نېچته عسکر کېلیب، ایکّلهسینی هم اولسواللیک مرکزیگه آلیب کېتگن. کېین او یېرده اولر نینگ نکاحینی اۉقیتیشگن.»
طالبلرنینگ سرپل ولایتی امینه قوماندانلیگی سۉزلاوچیسی نقیبالله الیمیار «اطلاعات روز» گزیتهسیگه یوبارگن پیامیده بو عیال عایلهوي زۉراورلیک سبب اۉز جانیگه قصد قیلگنینی ایتدی.
او باشقه تفصیلاتلرنی کېلتیرمهدی و اوشبو ایش بۉییچه بیرار کیشی جوابگرلیککه تارتیلگن یاکه یۉقلیگی حقیدهگی سوالگه هم جواب بېرمهدی.
