«افغانستان ملي مقاومت جبههسی» بیرلشگن ملتلر تشکیلاتینینگ افغانستاندهگی یاردم ادارهسی (یوناما) و خلق ارا انسان حقوقلری همجعیتیدن طالبلر تامانیدن جبههنینگ اۉلدیریلگن قوماندانی حسیب پنجشېرینینگ جسدیگه نسبتاً حرمتسیزلیک قیلینگنی یوزهسیدن تېرگاو اۉتکزیشنی سۉرهدی.
مقاومت جبههسینینگ سیاسي مسوولی عبدالله خنجانی بوگون (یکشنبه،۱ سنبله) ایکسدهگی صحیفهسیده یازیشیچه، طالبلرنینگ اوشبو حرکتی خلق ارا انسانی حقوق نینگ، خصوصاً، ژنو کانوانسیونلرینینگ عمومي ۳-مادّهسینینگ جدّي بوزیلیشی حسابلنهدی و اوروش جنایتی صفتیده بهالنیشی ممکن.
اونینگ ایتیشیچه، مقامت جبههسی جوابگرلیکنی تأمینلش، انسان قدر-قیمتینی حمایه قیلیش همده خلقارا حقوقي تمایل و معیارلرگه رعایه اېتیلیشینی تأمینلش اوچون زودلیک بیلن مستقل تېرگاو اۉتکزیلیشینی سۉرهماقده.
«افغانستان ملي مقاومت جبههسی» قوماندانلریدن بیری حسیب پنجشېري و اونینگ ایکّی همراهی اۉتگن هفته پنجشنبه کونی طالبلر نینگ سَلهنگدهگی پیستیرمهسیده هلاک بۉلگن.
ترقهلمهگن ویدېولرده طالبان اعضالرینینگ حسیب پنجشېري جسدیگه نسبتاً حرمتسیزلیک قیلگنی عکس اېتگن. اوشبو حرکت طالبانگه قرشی کېسکینلرنی کېلتیریب چیقرگن.
طالبلر جنگریلری بدخشانده اوشبو گروه نینگ ناراضی قوماندانی جمعه خان فاتح گه تېگیشلی هلاک بۉلگن شخصلرنینگ جسدلرینی هم تحقیرلهگن.
اجتماعي ترماقلرده ترقهلگن ویدېوده طالبان اعضالریدن بیری، گۉیاکه کېکسه اېرککه تېگیشلی بۉلگن جسدنی آیاقلری آستیده باسیاتگنی عکس اېتگن.
