محلي منبعلر دایکندیده «اطلاعات روز» گزیتهسیگه معلوم قیلیشیچه، بو ولایتنینگ میرامور اولسواللیگیده یاش عیال سابق اېری تامانیدن اۉلدیریلگن.
محلي منبعلردن بیری اوشبو واقعه بوگون اېرتهلب (دوشنبه،۲ سنبله) میرامور اولسوالیگینینگ «اسکان» حدودیده صادر بۉلگنینی ایتدی.
واقعه قربانی «شکیلا» تخمیناً۲۵ یاشده بۉلگن، اونینگ سابق اېری و اوشبو ایش بۉییچه گماندار «رحمت» اېسه تخمیناً۳۵ یاشده.
منبع نینگ ایتیشیچه، شکیلا اکهسی و آنهسی بیلن موتوسیکلده میرامور اولسواللیگی مرکزی تامان کېتهیاتگنیده، یۉل-یۉلهکهی سابق اېری تامانیدن تۉختهتیلگن.
منبع معلوماتیگه کۉره، شکیلا اسکان-کوپاج داوانیده «چرهیی» قورالی بیلن آتیلیب، باشیگه تېککن اۉق ضربهسی عاقبتیده جان بېرگن.
واقعه گمانداری شکیلانی اۉلدیرگچ، تگاب، میرامور اولسواللیگی مرکزی تامان کېتگن. بیراق او اۉزینی طالبلر کوچلریگه تاپشیرگنمی یاکه یۉقمی، حاضرچه معلوم اېمس.
اولر بوگون شکیلانینگ «مَهر» مسألهسیدهگی دعواسینی کۉریب چیقیش اوچون میرامور اولسواللیگی مرکزیگه باریشلری کېرهک اېدی.
شکیلا رحمت بیلن اجرهشگنیدن سۉنگ یقینده اۉزی نینگ۱۲ مینگ امریکا دالر مقداریدهگی مَهرینی طلب قیلگن اېدی.
واقعهدن خبردار منبع نینگ ایتیشیچه، شکیلا و رحمت سۉنگگی بیر نېچه ییل دوامیده کابلده یشهگن. رحمت امریکاگه کېتگن پیتده، شکیلا ایکّی اۉغلی – تخمیناً یېتّی و بېش یاشلی فرزندلری بیلن کابلده یششده دوام اېتگن.
اولر بیر نېچه آی آلدین عایلهوي ماجرا و کېینچهلیک «اساسسیز» دېب تاپیلگن عیبلاو سبب اجرهشگن.
منبع نینگ ایتیشیچه، رحمت امریکاده بۉلگن پیتده اونینگ عایلهسی شکیلانی بېگانه اېرکک بیلن مناسبتده بۉلگنلیکده عیبلهگن. شوندن سۉنگ طالبلرگه شکایت قیلینگن و هر ایکّی عیبلنووچی حبسگه آلینیب، کابلدهگی قماقخانهگه یوباریلگن.
ایکّی آیدن کم وقت ایچیده دستلب اېرکک عیبلنووچی، کېین اېسه شکیلا کابلدهگی طالبلر ولایت محکمهسی نینگ قراری اساسیده «عیبسیز» دېب تاپیلیب، قماقدن آزاد قیلینگن.
یقینده ایکّلهسی هم عایلهلری یشهیدیگن میرامور اولسواللیگیگه قَیتگن اېدی.
شکیلا و رحمت بیر-بیریگه «بوله» یاکه خاله فرزندلری بۉلگن و تخمیناً۱۰ ییل آلدین تورموش قوریشگن.
منبع نینگ ایتیشیچه، رحمت امریکاده دایمي یشش حقوقیگه هم اېگه بۉلگن و عیناً اوشبو عایلهوي نزاعنی حل قیلیش اوچون افغانستانگه قَیتگن.
منبع نینگ سۉزلریگه کۉره، شکیلا قماقدن آزاد اېتیلگچ، میرامورگه کېلگن و اۉز مَهرینی اوندیریش اوچون میرامور اولسواللیگی مرکزیگه ینگی دعوا عریضهسی بیلن مراجعت قیلگن.
بیر نېچه باسقیچدن اۉتگچ، اولر بوگون اولسواللیک مرکزیگه باریشی و باشلنغیچ محکمه اۉز قرارینی چیقریشی کېرهک اېدی.
حاضر شکیلانینگ جسدی اۉقاتر قورالدن تېککن بیر نېچته جراحتلر بیلن شفاکارلر کۉریگیدن اۉتکزیش اوچون اسکان محلي شفاخانهسیگه آلیب باریلگن. اونینگ عایلهسی اېسه ایشنی اۉرگنیش اوچون هیئت یوباریلیشینی سۉرب میرامور اولسواللیگی مرکزی بیلن باغلنگن.
