طالبلرنینگ هراتدهگی استخبارات ادارهسی مدنی فعال و بیلیم یورتی اۉقیتووچیسی غلام نبی مدثرنی جبریل حدودی اهالیسی ناراضیلیکلری حقیدهگی خبرلرنی قَیته ترقهتگنی اوچون حبسگه آلیب، قماققه تشلهگن.
غلام نبی مدثرنینگ یقینلریدن بیری بوگون (دوشنبه،۲سنبله) «اطلاعات روز» گزیتهسیگه معلوم قیلیشیچه، او۱۵ کوندن بېری طالبان استخباراتی قۉلیده سقلنماقده و اونینگ تقدیری همده احوالی حقیده هېچ قندهی معلومات یۉق.
منبع نینگ ایتیشیچه، مدثر ۱۸-اگوست کونی هرات نینگ جبریل منطقهسیدن طالبلر استخباراتی تامانیدن حبسگه آلینگن.
مدثرنینگ قرینداشلریدن بیری اونینگ عادي اهالی و تینچ اهالی وکیلی اېکنینی، مدنی فعالیتی همده حقوق طلب قیلیشگه قرهتیلگن حرکتلری دایما تینچ یۉل بیلن عملگه آشیریلگنینی ایتگن.
مدثرنینگ قرینداشلری عامهوي اخبارات واسطهلری و انسان حقوقلری تشکیلاتلریدن اونینگ تقدیری آیدینلشتیریلیشی و آزاد اېتیلیشینی طلب قیلیش اوچون بو حالتنی یاریتیشنی سۉرهگن.
منبعلر نینگ معلوم قیلیشیچه، اوشبو مدنی فعال جبریل اهالیسی ناراضیلیگی حقیدهگی خبرلرنی ترقهتگنی و اوشبو ناراضیلیک نمایشلریده هلاک بۉلگنلردن بیری حقیده معلومات بېرگنی سببلی حبسگه آلینگن.
۱۹-جوزاگه تۉغری کېلهدیگن کونی، هرات نینگ هزارهلر یشهیدیگن جبریل منطقهسینینگ بیر گروه اهالیسی عیاللر و قیزلرنینگ کيینیش اسلوبی سببلی حبسگه آلینهیاتگنیگه قرشی نمایش اۉتکزگن.
بیرلشگن ملتلر تشکیلاتینینگ افغانستاندهگی یاردم ادارهسی (یوناما) نینگ معلوم قیلیشیچه، نمایش طالبلرنینگ ملکی کییمیدهگی کوچلری نمایشچیلرنی کلتکلهی باشلهگن و اولرگه قرهته اۉق اوزگن پیتده زۉراورلیککه ایلنگن.
یوناما گزارشیده ایتیلیشیچه، طالبان کوچلری بیر بالهنی آتیب اۉلدیرگن همده بیر قطار نمایشچیلرنی کلتکلب، اولرگه قرهته اۉق اوزگن. نتیجهده کمیده تۉرت کیشی جراحتلنگن. یوناما گزارشیده طالبلر کوچلری کمیده ۱۷ نفر نمایشچینی حبسگه آلگنی قید اېتیلگن. حساباتده حبسگه آلینگنلرنینگ کېینگی تقدیری حقیده معلومات بېریلمهگن
