غربی کابلدهگی دشت برچی منطقهسیدهگی منبعلرنینگ خبر بېریشیچه، اوشبو حدود اهالیسی آرهسیده «زهرلنیش»گه اۉخشش نامعلوم یوقوملی کسللیک ترقهلگن و او تاباره کېنگهیماقده.
منبعلرگه کۉره، کسللیک اۉتگن هفتهدن باشلب «قلعه-نو» حدودیدهگی «ولیعصر شهرچهسی» و «عرفانی شهرچهسی» نینگ اَیریم قِسملریده ترقهله باشلهگن.
منبعلردن آلینگن معلوماتلرگه کۉره، کسللیک نینگ دستلبکی بېلگیلری ایچ کېتیشی، ایسیتمه و باش آغریغیدن عبارت بۉلهدی، کېینچهلیک اېسه ایچ کېتیشی قانلی توسگه کیرهدی.
«اطلاعات روز» گزیتهسیگه خبر یوبارگن منبعلردن بیری غربي کابلدهگی شفاخانه و داروخانهلر بېمارلر بیلن تۉلیب کېتگنینی ایتدی. اونینگ سۉزلریگه کۉره، بېمارلرنینگ اکثریتی بالهلر و کېکسهلردیر.
اونینگ ایتیشیچه، ایکّی نفر یاش فرزندی و آتهسی اوشبو کسللیککه چهلینگن، بیراق تورلی طبیات مرکزلریگه مراجعت قیلیشلریگه قرهمهی، هنوز دوالنمهگن.
منبع یاش بالهلرینی دوالش اوچون کابلدهگی آتاتورک شفاخانهسیگه آلیب بارگنینی، بیراق اولرگه یاردم کۉرسهتیلمهگنی سببلی ینه اویگه قَیتگنینی ایتدی.
شونینگدېک، اوتیناوون (یکشنبه، 1-سنبله) محلي مسجدده اعلان قیلینگنیدن سۉنگ، بیر گروه بېمارلر محمد علی جناح شفاخانهسیگه آلیب باریلگنینی، بیراق بېمارلر اوشبو شفاخانهده یوباریلگن دارولرگه حساسیت بیلدیرگنیدن کېین کابلدهگی انتانی کسللیکلر شفاخانهسیگه کۉچیریلگنینی ایتدی. او بېمارلر سانینی تخمیناً 20 نفر اېرکک و 20–30 نفر عیال دېب کۉرسهتدی.
منبع نینگ سۉزلریگه کۉره، انتانی کسللیکلر شفاخانهسیده هم شفاکارلر فقط تامیر آرقهلی سیروم اۉتکزماقده و باشقه هېچ قندهی دارو بویورمهگن.
اونینگ ایتیشیچه، هېچ بیر شفاکار اولرگه بو کسللیک نیمه اېکنینی و اونی قندهی دوالش کېرهکلیگینی توشونتیرمهگن.
غربي کابلدهگی خصوصي شفاخانهلردن بیری نینگ نرسی هم حاضرگچه اوشبو کسللیک اوچون هېچ قندهی دوالش اصولی تاپیلمهگنینی ایتدی.
او شوندهی دېدی: «معما شوندهکی، بېمارلر عموماً توزهلمهیپتی. یعنی، دارولر تأثیر قیلمهیپتی. هر بیر نېچه ساعتده آدم نینگ قارنی بوریشیب، قوسیشی باشلنهدی.»
غربي کابلدهگی ینه بیر منبع «اطلاعات روز» گزیتهسیگه اَیریم خصوصي مکتب اۉقووچیلری هم اوشبو کسللیککه چهلینگنینی ایتدی. اونینگ سۉزلریگه کۉره، بېمارلرنینگ اکثریتی کۉچمه تانکرلردهگی خام سوو فایدهلنهدیگن آدملردیر.
منبع نینگ ایتیشیچه، غربي کابلدهگی کوچلی سوو تنقیصلیگی سببلی ولیعصر و عرفانی شهرچهلریدهگی کۉپلب عایلهلر ایچیملیک سووینی کۉچمه تانکرلردن ساتیب آلیب، اوندن فایدهلنماقده.
طالبلرنینگ ساغلیقنی سقلش مسووللری حاضرچه غربي کابلده اوشبو کسللیک ترقهلهیاتگنی حقیده ایضاح بېرمهگن.
غربي کابلدهگی دشت برچی حدودیده اساسن هزارهلر استقامت قیلهدی و او افغانستان پایتختی نینگ اېنگ قشّاق همده رواجلنمهگن حدودلریدن بیری حسابلنهدی.
طالبان اۉتگن ییلی محمد علی جناح دولت شفاخانهسی نینگ جهازلری و توزیلمهسینی اوشبو حدوددن کابل شرقیدهگی «ارزان قیمت» منطقهسیگه کۉچیرگن اېدی.
