غور ولایتینینگ لعل و سرجنگل اولسواللیگی یشاوچیلر اقتصادي احوالی آغیر بۉلیشیگه قرهمهی، طالبلر اولردن برچه اېکینچیلیکلری و چارواچیلیک محصولاتلریدن عشر آلهیاتگنینی اَیتماقده.
اوشبو اولسواللیک اهالیسیدن بیری عشر ییغیش فقط لعل و سرجنگل اولسواللیگیده دوام اېتهیاتگنینی، غورنینگ باشقه اولسواللیکلریده اېسه طالبلر عشر ییغمهیاتگنینی ایتدی.
اونینگ سۉزلریگه کۉره، طالبلر خادملری اهالینینگ بوغدای، عدس، نخود و کچالو کبی برچه اېکینچیلیک محصولاتلرینینگ اۉندن بیر قِسمینی آلماقده. اگر کیمدیر عشر تۉلهشدن باش تارتسه، حبسگه آلینهدی.
اونینگ ایتیشیچه، طالبلر اوشبو اولسواللیک اهالیسیگه عشر تۉلهمسدن توریب، اۉز قیشلاق اېکینچیلیک محصولاتلرینی ییغیب آلیشگه حقلری یۉقلیگینی بیلدیرگن.
شونینگدېک، اونینگ سۉزلریگه کۉره، بو گروه اهالینینگ هر۱۰ باش چارواسیدن بیر باشینی عشر صفتیده آلماقده.
اونینگ ایتیشیچه، حاصل و دهقانچیلیکنینگ احوالی «یخشی اېمس»لیگیگه قرهمهی، عشر ییغیش جریانی دوام اېتماقده.
اونینگ سۉزلریگه کۉره، دهقانلر سوو تأمیناتی و اۉغیت ساتیب آلیش اوچون کتّه خرجتلرنی کۉترهیاتگن بیر پیتده، درآمدلرینینگ بیر قِسمینی طالبلرگه بېریشگه مجبور بۉلماقده.
اونینگ ایتیشیچه، اوشبو اولسواللیک اهالیسی «طالباننینگ عشریدن تۉییب کېتگن».
طالبلر مملکت بۉیلب اهالینینگ اېکینچیلیک و چارواچیلیک محصولاتلریدن عشر ییغهدی. بو جریان کېتمه-کېت قورغاقچیلیکلر دهقانلر و قیشلاق عایلهلریگه ضرر یېتکزهیاتگن بیر پیتده دوام اېتماقده. بیراق بیرلشگن ملتلر تشکیلاتلری معلوماتلریگه کۉره، مملکت اهالیسینینگ یرمیدن کۉپی قشّاقلیک و آچلیک بیلن یوزمه-یوز بۉلیب، خارجي انسانپرورلیک یاردمگه محتاج.
