افغانستان انسان حقوقلری و دموکراسی موسسهسی طالبلر ۲۰۲۲-ییل فبروریدن ۲۰۲۶-ییل اپریلیگچه افغانستانده۲ مینگ۷۴۵ کیشینی عامه آلدیده قمچیلهگنینی ایتدی.
اوشبو انستیتوت بوگون، سهشنبه، ۳-سنبله کونی «حاکمیت قمچیلری، نظارت نمایشی؛ طالبلرنینگ عامهوي قمچیلشلرینی حجتلشتیریش» ناملی گزارشینی نشر قیلدی.
افغانستان انسان حقوقلری و دموکراسی موسسهسینینگ معلوم قیلیشیچه، ۲۰۲۲ییل فبروریدن ۲۰۲۶-ییل اپریلیگچه عامه آلدیده قمچیلش بیلن باغلیق۶۳۴ ته حالت حجتلشتیریلگن بۉلیب، اولر جمعی۲ مینگ۷۴۵ کیشینی قمرهب آلهدی.
اوشبو موسسهنینگ بیاناتیگه کۉره، حجتلشتیریلگن حالتلرنینگ اکثریتی جنسي جنایتلر یاکه «اخلاقي جنایتلر» دېب اتلهدیگن عیبلاولر بیلن باغلیق بۉلگن. اولر آرهسیده مناسبتلر، جنسي خطی-حرکتلر و عیاللرنینگ حرکتلنیشیگه عاید چېکلاولر کبی حالتلر موجود.
موسسهنینگ قۉشیمچه قیلیشیچه، عامهوي قمچیلشلر کۉپینچه تماشابینلر گروهلری آلدیده عملگه آشیریلهدی و بو تحقیرلنیش، اجتماعي تمغهلش همده روحي ضررنی ینه-ده کوچهیتیرهدی.
موسسه گزارشیده عامهوي قمچیلش جزا بېریش، قۉرقیتیش و اجتماعي نظارت نینگ تیزیملی واسطهسیگه ایلنگنی، افغانستان بۉیلب قۉللنهیاتگنی و تاباره کۉپراق طالبلرنینگ دیني همده اجتماعي معیارلر حقیدهگی چېکلاوچی قرهشلرینی مجبورن سینگدیریش اوچون ایشلهتیلهیاتگنی قید اېتیلگن.
افغانستان انسان حقوقلری و دموکراسی موسسهسی اۉز گزارشیده قانوني محکمه جریانی تمایللرینینگ جدّي بوزیلیشی، جملهدن، اۉزباشیمچهلیک بیلن حبسگه آلیش، مجبوري اقرارلر همده وکیل مدافع، دلیللر و گواهلردن فایدهلنیش امکانیتیدن محروم قیلیش حالتلرینی هم حجتلشتیرگنینی بیلدیردی.
اوشبو تشکیلاتنینگ حقوقي تحلیلیگه کۉره، عامهوي قمچیلش قییناقلر و یامان معاملهنی تعقیقلش، شخصي حیات دخلسیزلیگی، بیرلشیش و ییغیلیش اېرکینلیگی، عدالتلی محکمهدن فایدهلنیش حقوقی همده قانوني محکمه جریانی تمایللریگه رعایه اېتیش کبی انساننینگ اساسي حقوقلرینی بوزهدی.
موسسه بیاناتیگه کۉره، گزارشده رم اساسنامه سیگه موافق انسانیتگه قرشی جنایتلر و اوروش جنایتلری بیلن باغلیق بۉلیشی ممکن بۉلگن دلیللر هم انیقلنگن. اولر آرهسیده قییناقلر، تعقیب، قماققه آلیش، شفقتسیز و غیرِ انساني معامله، عدالتلی محکمه حقوقیدن محروم قیلیش همده انسان قدر-قیمتینی تحقیرلش کبی حالتلر بار.
افغانستان انسان حقوقلری و دموکراسی موسسهسی اوشبو حسابات اۉزی حجتلشتیرگن حالتلر، شونینگدېک، قمچیلنگن 23 نفر جبرلنووچی نینگ شخصي گواهلیکلری اساسیده تیارلنگنینی ایتدی.
موسسه حسابات خلاصهلری اعلان قیلینگن پیتده موجود بۉلگن دلیللرنی عکس اېتتیریشینی و اونی عامهوي قمچیلش بیلن باغلیق برچه حقوقبوزرلیکلر یاکه خلقارا جنایتلرنینگ تۉلیق حساباتی صفتیده قبول قیلمسلیک کېرهکلیگینی تأکیدلهدی.
افغانستان انسان حقوقلری و دموکراسی انستیتوتی عامهوي قمچیلشلرنی عملگه آشیرگن شخصلرنینگ جوابگرلیککه تارتیلیشینی طلب قیلدی. شونینگدېک، دولتلر، خلقارا انسان حقوقلری تشکیلاتلری و باشقه تشکیلاتلرنی مستقل مانیتورینگنی کوچهیتیریشگه، اوشبو حالتلرنی تېکشیریشگه، جبرلنووچیلرنی قۉللب-قوّتلشگه و مسووللرنی جوابگرلیککه تارتیش اوچون چارهلر کۉریشگه چقیردی.
طالبلر افغانستانده حاکمیتنی قَیته قۉلگه کیریتگنیدن سۉنگ عامه آلدیده قمچیلش جزالرینی قَیته تیکلهدی و کمیده۱۲ کیشینی هم عامه آلدیده قتل اېتدی.
شونگه قرهمهی، اوشبو گروه نینگ عالي محکمهسی سۉنگگی آیلرده عامهوي قمچیلش و قتل جزالری اجرا اېتیلگنی حقیدهگی خبرلرنی اعلان قیلیشنی تۉختهتدی. بیراق خبرلرگه کۉره، بوندهی جزالر همان دوام اېتماقده.
