طالبلرنینگ مسکوده‌گی اېلچیسی گُل حسن پاکستاننی منطقه خوفسیزلیگی و برقرارلیگیگه تهدید منبعی دېب اته‌دی.
عینِ پیتده اسلام آباد طالبلر نظارتیده‌گی افغانستان پاکستان خوفسیزلیگیگه تهدید ساله‌یاتگنینی تأکیدله‌ماقده.
گُل حسن مسکوده افغانستان و مرکزي آسیاگه بغیشلنگن خوفسیزلیک ییغیلیشیده‌گی نطقیده پاکستان طالبلرگه قرشی کوچلرنی قۉللب-قوّتله‌یاتگنی و داعش فعالیتی اوچون شرایط یره‌ته‌یاتگنینی دعوا قیلدی.
اونینگ ایتیشیچه، پاکستان افغانستان‌نینگ سابق حکومتی حربي خدمتچیلری همده مینگلب داعش جنگریلرینی بلوچستانده قوراللنتیریب، جایلشتیرگن.
طالبلر رسميسی، شونینگدېک، صنعي یۉلداش تصویرلری پاکستان‌ده کۉکناری یېتیشتیریله‌یاتگنینی کۉرسه‌ته‌یاتگنینی ایتدی.
طالبلر رسميلری بوندن اوّل هم پاکستاننی اوشبو گروهگه قرشی کوچلرنی قۉللب-قوّتلشده عیبله‌گن اېدی. بیراق پاکستان رسميلری بو دعوالرنی اساسسیز دېب اته‌گن.
باشقه تاماندن، پاکستان طالباننی پاکستاندهگی گروهلرنی، جمله‌دن، پاکستان طالبانی (تی‌تی‌پی)نی قۉللب-قوّتلشده عیبله‌یدی و افغانستاندن تروریزم اېکسپورت قیلینیشیگه چېک قۉییلیشی کېره‌کلیگینی بیلدیرماقده. طالبان اېسه افغانستان‌ده خارجي گروهلر موجودلیگینی انکار اېته‌دی.
یقینده پاکستان باش وزیری اۉرین‌باسری و تشقی ایشلر وزیری اسحاق‌دار: «اگر افغانستان طالبلر رژیمی اۉز حدودیدن فعالیت یوریته‌یاتگن ترورچیلرگه قرشی چاره کۉرمسه، آخر-عاقبت بونینگ عاقبتلریگه دوچ کېله‌دی»، دېیه آگاهلنتیردی.
پاکستاندهگی خوفسیزلیک‌نینگ یامانلشووی و اسلام آبادنینگ پاکستاندهگی گروهلر افغانستان توپراغیدن فایده‌لنه‌یاتگنیگه عاید دعوالری سبب پاکستان حکومتی و طالبلر اۉرته‌سیده‌گی کېسکینلیک کوچه‌یگن. اۉتگن ییلدن بویان افغانستان و پاکستان اۉرته‌سیده‌گی چېگره اۉتیش بندرلری یاپیق بۉلیب، ایکّی دولت اۉرته‌سیده‌گی سودا توخته‌ب قالگن.
پاکستان ترورچیلرنینگ باش‌پناه‌لری دېب اته‌یاتگن حدودلرگه هجوم قیلیش مقصدیده افغانستان‌نینگ چېگره ولایتلریگه هوا ضربه‌لری بېرماقده. طالبان و بیرلشگن ملتلر تشکیلاتی معلوماتلریگه کۉره، اوشبو هجوملرده تینچ اهالی وکیللری هم هلاک بۉلماقده.
طالبلر بو هجوملرگه جوابن پاکستان‌نینگ چېگره پُستلریگه هجوم قیلگن. اۉتگن ییلدن بویان دیوره‌ند چیزیغی اطرافیده بیر نېچه بار قوراللی تۉقنه‌شوولر صادر بۉلگن.
