امریکا قۉشمه ایالتلرنینگ شهروندلیک و مهاجرت خدمتی مملکت عدلیه وزیرلیگی بیلن همکارلیکده ۴۰ کیشینی، جمله‌دن، افغانستان‌نینگ ایکّی وطنداشینی امریکا وطنداشلیگینی محروم اېتیش بۉییچه محکمه ایشلرینی باشله‌گنینی معلوم قیلدی.
امریکا عدلیه وزیرلیگی‌نینگ وبسایتیده نشر قیلینگن بیاناتگه کۉره، اوشبو شخصلر خارجي دولت صفتیده فعالیت یوریتیش، شخصنی ساخته‌لشتیریش، احتیاطسیزلیک عاقبتیده آدم اۉلیمیگه سبب بۉلیش همده علیحده مقامگه اېگه اېرکککه نسبتاً زۉرآورلیک بیلن باغلیق جنسي جنایت کبی آغیر حقوقبوزرلیکلرده عیبلنماقده.
بیاناتده وطنداشلیگیدن محروم اېتیلیشی ممکن بۉلگن ایکّی افغانستانلیک ۵۵ یاشلی وارث‌جان صفي و ۵۷ یاشلی اسدجان رامین نینگ اسملری کېلتیریلگن.
امریکا شهروندلیک و مهاجرت خدمتی‌نینگ معلوم قیلیشیچه، «طارق محمود» نامی بیلن هم تنیلگن وارث‌جان صفيگه قرشی نیویورک ایالتی نینگ شرقي بۉلگه.ی فدرا‌ل محکمه‌سیگه دعوا عریضه‌سی کیریتیلگن.
امریکا شهروندلیک و مهاجرت خدمتی‌نینگ بیاناتیگه کۉره، صفي ۱۹۹۵-ییلده ساخته پاکستان پاسپورتیدن فایده‌لنیب، «طارق محمود» نامی بیلن امریکاگه کیرگن. اونینگ شخصی انیقلنگنیدن سۉنگ، او افغانستان وطنداشی اېکنینی تن آلگن. شوندن کېین اونگه نسبتاً دېپورت جریانی باشلنگن و ۱۹۹۵ییلده مهاجرت محکمه‌سی اونی امریکادن چیقریب یوباریش حقیده قرار چیقرگن.
اداره نینگ قۉشیمچه قیلیشیچه، صفي محکمه‌‌نینگ قراریگه بۉیسونیب، امریکانی ترک اېتیش اۉرنیگه، اۉزیگه ینگی شخص یره‌تگن، امریکا فقراسی بیلن تورموش قورگن و اوشبو نکاح آرقه‌لی قانوني دایمي یشش مقامینی آلگن.
اداره معلوماتیگه کۉره، صفي وطنداشلیک آلیش بۉییچه صحبت دوامیده قسم‌یاد قیلگن بۉلسه-ده، اۉزی نینگ تورلی شخصیتلری، مهاجرت امتیازلرنی آلیش اوچون بیر وقت نینگ اۉزیده تاپشیرگن عریضه‌لری همده وطنداشلیک بېریلیشیگه تۉسقینلیک قیلیشی ممکن بۉلگن باشقه ناقانوني خطی-حرکتلری حقیده معلومات بېرمه‌گن.
امریکا شهروندلیک و مهاجرت خدمتی، شونینگدېک، اسدجان رامین نینگ فقرالیگینی بېکار قیلیش مقصدیده پنسلوانیا ایالتی‌نینگ شرقي بۉلگه‌ی فدرا‌ل محکمه‌سیگه هم دعوا عریضه‌سی کیریتیلگنینی معلوم قیلگن. اداره اونینگ قریب ۳۰ ییل دوامیده شخصینی ساخته‌لشتیریب کېلگنینی تأکیدله‌گن.
بیاناتگه کۉره، رامین اۉزینی «احمدشاه کوهستانی» اسملی شخص صفتیده تنیشتیریب، تورلی مهاجرت امتیازلرنی قۉلگه کیریتگن. بو جریان آخر-عاقبت اونینگ امریکا فقرالیگینی آلیشی بیلن یکونلنگن.
اداره‌‌نینگ معلوم قیلیشیچه، وطنداشلیک آلیش جریانیده او اۉز اسمینی «احمدشاه کوهستانی»دن «اسدجان رامین»گه اۉزگرتیرگن. اصلیده اېسه اونینگ حقیقي اسمی باشیدناق اسدجان رامین بۉلگن و او هېچ قچان احمدشاه کوهستانی بۉلمه‌گن.
امریکا شهروندلیک و مهاجرت خدمتی رامین باشقه بیر افغانستانلیک نینگ شخصینی اونینگ خبری و راضیلیگیسیز اۉزلشتیرگنینی بیلدیرگن.
مذکور اداره نشر قیلگن رۉیخطده ایران، پاکستان، هندستان، فیلپین، میکسیکو، انگليه، وېنېسوېله و کوبه کبی تورلی مملکتلردن بۉلگن شخصلر نینگ اسملری هم بار.
اداره امریکا نینگ مهاجرت و شهروندلیک تۉغریسیده‌گی قانونیگه موافق، اگر شخص فقرالیکنی ناقانوني یۉل بیلن، مهم معلوماتلرنی یشیریش یاکه یالغان معلومات بېریش آرقه‌لی قۉلگه کیریتگن بۉلسه، اونینگ فقرالیگی بېکار قیلینیشی و فقرالیک گواهنامسی حقیقي اېمس دېب تاپیلیشی ممکنلیگینی تأکیدله‌گن.
اداره اوشبو تشبثنی دونالد ترامپ مأموریتی دوریده بیر وقت‌نینگ اۉزیده عملگه آشیریلگن اېنگ ییریک فقرالیکدن محروم اېتیش چاره‌سی دېب بهاله‌گن.
