بیرلشگن ملتلر تشکیلاتی‌نینگ ترقیات دستوری‌نینگ معلوم قیلیشیچه، ۲۰۲۶-ییلگی کۉپ اۉلچاولی قشّاقلیک سطح (ام‌پی‌آی) اوشبو سطح ۲۰۱۰-ییلده جاري اېتیلگنیدن بویان ایلک بار کۉپ اۉلچاولی قشّاقلیکده یشه‌یاتگن آدملر سانی آشگنینی کۉرسه‌تماقده. افغانستان قشّاقلیک و آچرچیلیک بحرانی تاباره کوچه‌یه‌یاتگن مملکتلردن بیریدیر.
بوگون، شنبه، ۲۵-میزان قشّاقلیکنی توگه‌تیش خلق‌ارا کونیده اعلان قیلینگن احصایه معلوماتلرگه کۉره، دنیا بۉییچه قریب ۱.۲ میلیارد کیشی اۉته قشّاقلیکده یشه‌ماقده.
بو کۉرسنکیچ ۲۰۲۵-ییلگی گزارش‌گه نسبتاً دنیاده کۉپ اۉلچاولی قشّاقلیک آشگنینی انگله‌ته‌دی. ۲۰۲۵-ییلگی گزارش‌ده قشّاقلیکده یشه‌یاتگنلر سانی ۱.۵ میلیارد کیشی دېب قید اېتیلگن اېدی.
شو بیلن بیرگه، قریب ۹۵۲میلیون کیشی قشّاقلیککه توشیب قالیش خوفی آستیده.
بیرلشگن ملتلر تشکیلاتی‌نینگ گزارشیگه کۉره، قشّاقلیکده یشه‌یاتگنلرنینگ یرمیدن کۉپی، یعنی ۵۱.۱ فایزی یاکه ۶۷۱ میلیون کیشی ۱۸یاشگچه بۉلگن باله‌لردیر.
دېیرلی هر اوچ باله‌دن بیری کۉپ اۉلچاولی قشّاقلیک بیلن یوزمه-یوز کېلماقده. کتّه‌لر آره‌سیده اېسه هر یېتّی کیشیدن بیری قشّاقلیکده یشه‌یدی.
بیرلشگن ملتلر تشکیلاتی‌نینگ گزارشیگه کۉره، باشقه منطقه‌لرگه نسبتاً افریقا مملکتلریده باله‌لر قشّاقلیگی درجه‌سی اېنگ یوقاری. بو منطقه‌ده ۳۵۵ میلیون باله قشّاق حسابلنه‌دی.
اوندن کېینگی ا‌ۉرینده جَنوبي آسیا توره‌دی. بو حدودده ۱۸۱ میلیون باله قشّاقلیکده یشه‌یدی و اولر منطقه‌ده‌گی قشّاق اهالی‌نینگ ۴۶.۱ فایزینی تشکیل اېته‌دی.
افغانستان‌ده قشّاقلیک
بیرلشگن ملتلر تشکیلاتی‌نینگ ۲۰۲۶-ییلگی کۉپ اۉلچاولی قشّاقلیک حساباتیگه کۉره، افغانستان اهالیسی‌نینگ قریب ۴۶.۶ فایزی کۉپ اۉلچاولی قشّاقلیکده یشه‌یدی. اوشبو حساب-کتاب ۲۰۲۰ ۲۰۲۳-ییللرده اۉتکزیلگن بهالش معلوماتلری اساسیده عملگه آشیریلگن.
افغانستان اهالیسی ۲۰۲۳-ییلده ۲۶.۸۹ میلیون، ۲۰۲۴-ییلده اېسه قریب ۲۷.۶۷ میلیون کیشی دېب بهالنگن. حال‌بوکه، مملکت اهالیسی ۳۶ میلیوندن آرتیق دېب حسابلنه‌دی. بیرلشگن ملتلر تشکیلاتی یقینده مهاجرلرنینگ قَیتیب کېلیشینی حسابگه آلگن حالده افغانستان اهالیسینی ۴۰ میلیون کیشی دېب بهاله‌گن اېدی.
کۉپ اۉلچاولی قشّاقلیک حساباتیگه کۉره، افغانستانده‌گی قشّاق اهالی نینگ محروملیک درجه‌سی اۉرته‌چه ۵۵.۵ فایزنی تشکیل اېته‌دی. بو هر بیر قشّاق کیشی بیر وقت نینگ اۉزیده تورموش درجه‌سی نینگ ستندرد کۉرستکیچلریدن یرمیدن کۉپراغیدن محروم اېکنینی انگله‌ته‌دی.
حساباتگه کۉره، مملکت اهالیسی نینگ قریب ۳۹.۱ فایزی اۉته آغیر قشّاقلیک شرایطیده یشه‌ماقده.
شونینگدېک، مملکت اهالیسی‌نینگ قریب ۱۹.۹ فایزی قشّاقلیک چېگره‌سیده بۉلیب، آغیر شرایطلرگه جوده ضعیف حسابلنه‌دی.
محروملیک کۉرستکیچلری آره‌سیده تعلیم اېنگ کتّه اولوشنی — ۴۲.۵ فایزنی تشکیل اېته‌دی. بو تعلیم و سوادخوانلیک ساحه‌سیده‌گی جدّي بحراندن دلالت بېره‌دی.
تورموش درجه‌سی ۳۳.۴ فایز بیلن محروملیک نینگ ایکّینچی اېنگ کتّه قِسمینی تشکیل اېته‌دی. ساغلیقنی سه‌قلش ساحه‌سی اېسه ۲۴.۱ فایز بیلن کېینگی ا‌ۉرینده توره‌دی.
ملي پول قشّاقلیگی چېگره‌سی معلوماتلریگه کۉره، افغانستان اهالیسی‌نینگ قریب ۴۷.۱ فایزی پول درآمدلری بۉییچه قشّاقلیک چېگره‌سیدن پستده یشه‌یدی.
بو حالت آزیق-طعام خوفسیزلیگی‌نینگ کېنگ کۉلمده بوزیلیشیگه آلیب کېلگن. بیرلشگن ملتلر تشکیلاتی‌نینگ معلوماتیگه کۉره، کېله‌یاتگن قیش موسمیده افغانستان اهالیسی‌نینگ قریب ۴۰ فایزی اۉتکیر آزیق-طعام تنقیصلیگیگه دوچ کېله‌دی.
شونینگدېک، ۴ میلیوندن آرتیق باله تۉییب طعاملنمسلیک سببلی دوالنیشگه محتاج بۉلیشی کوتیلماقده.
