افغانستان تحلیلچیلر ترماغی اۉزی‌نینگ ینگی حساباتیده ایتالياده‌گی افغان مهاجرلری باش‌پناه آلیش جریانیدن فایده‌لنیش و یشش حجتلرینی آلیش امکانیگه اېگه بۉلیشلریگه قره‌مه‌ی، یشش مقامینی بېلگیلش، مناسب ایش تاپیش و جمعیتگه انتیگراسیون‌لشیش باره‌سیده جدّي معمالرگه دوچ کېله‌یاتگنینی ایته‌دی.
شنبه کونی (۲۵ میزان) نشر قیلینگن حساباتگه کۉره، ایتالیا کۉپلب افغان مهاجرلری اوچون یکوني منزل اېمس، بلکه اروپانینگ باشقه مملکتلریگه یېتیب باریش یۉلیده‌گی بیر بېکت حسابلنه‌دی.
گزارشگه کۉره، ۲۰۲۵-ییلده ایتالیاده‌گی افغان مهاجرلری سانی قریب ۱۹ مینگ کیشیگه یېتگن. ۲۰۱۱-ییلده اېسه بو کۉرسه‌تکیچ ۴ مینگ کیشیدن کم بۉلگن.
افغانستان تحلیلچیلر ترماغی معلوماتیگه کۉره، یشش حقوقینی آلیش یاکه باشقه اروپا مملکتلریگه اۉتیش مقصدیده ایتالیاگه کېلگن افغان مهاجرلری‌نینگ اکثریتی دستلب تريست شهریگه کیریب کېله‌دی. ترماق گزارشیده ایتیلیشیچه، ۲۰۲۱-ییلدن ۲۰۲۶-ییلگچه قریب ۳۰ مینگ نفر افغان فقراسی تريست شهریده معلوم مدت بۉلگن.
افغانستان تحلیلچیلر ترماغی تدقیقاتچیسی فابریزیو فوشینی یازیشیچه، کۉپلب افغان مهاجرلری ایتالیاگه کېلگنیدن سۉنگ، اینیقسه قیشلاق خۉجه‌لیگی، توریزم، قوریلیش و خدمت کۉرسه‌تیش ساحه‌لریده ایشله‌ی باشله‌یدی. بیراق اولرنینگ اَیریملری «پست ایش حقی، رسمي شرطنامه‌‌نینگ یۉقلیگی، اوزاق ایش ساعتلری و خوفسیز بۉلمه‌گن محنت شرایطلری»گه دوچ کېله‌دی.
گزارشده نارسمي ایشچی کوچی واسطه‌چیلیگی و ایشچیلر نینگ استثمارسینی انگله‌ته‌دیگن «کاپورالاتو» دېب اته‌لووچی حادثه کېنگ ترقه‌لگنی و عملده افغان مهاجرلرینی «استثمار» خوفی آستیده قالدیره‌یاتگنی قید اېتیلگن.
افغانستان تحلیلچیلر ترماغی تأکیدلشیچه، ایتالیاده‌گی کۉپلب افغان مهاجرلری اۉزلری‌نینگ یشش خرجتلرینی قاپلشدن تشقری، وطنده‌گی عایله اعضالری و قرینداشلرینی هم قۉللب-قوّتلش مسوولیتینی اۉز ذمّه‌سیده سقلب قاله‌دی. عیناً شو سببلی تېزراق درآمد تاپیش ضرورتی اولرنی پست ایش حقی و اکسپلواتاتسیان محنت شرایطلریگه نسبتاً ینه‌ده ضعیف حالگه کېلتیره‌دی.
ترماق نینگ ایتیشیچه، اَیریم افغان مهاجرلری حتا یشش حجتلریگه اېگه بۉلیشیگه قره‌مه‌ی، ناقوله‌ی محنت شرایطلری یاکه ایش امکانیتلری‌نینگ چېکلنگنی سببلی ایتالياده برقرار حیات قوره آلمه‌گن. باشقه‌لری اېسه پست ایش حقی و کېله‌جکده‌گی رواجلنیش امکانیتلری نینگ یۉقلیگی سببلی مملکتنی ترک اېتیب، اروپا اتفاقی نینگ باشقه دولتلریگه کېتگن.
مؤلف تريست شهری یقینیده‌گی مونفالکونه کېمه‌سازلیک زواد(فابریکه)لریده کېله‌جکده‌گی ایش فعالیتینی یۉلگه قۉییشگه اورینگن، بیراق کېینچه‌لیک ایشینی تشلب، اروپا اتفاقی‌نینگ باشقه مملکتلریگه کېتگن بیر نېچه افغان ایشچیلر حقیده هم یازه‌دی.
گزارشده ایتیلیشیچه، بونده‌ی قرارگه کېلیش‌نینگ اساسي سببی کسبي جهتدن رواجلنیش و معلوم درجه‌ده‌گی ایش حقیدن یوقاریگه کۉتریلیش امکانیتی نینگ یۉقلیگی بۉلگن. حساباتگه کۉره، بو ساحه‌ده‌گی ایشچی کوچی‌نینگ اساسي قِسمینی بنگله‌دېشلیک ایشچیلر تشکیل اېته‌دی و اولر کیچیک کمپنیلر همده بنگله‌دېشلیک ایشگه جایلشتیریش اگېنتلیکلری آرقه‌لی تشکیل اېتیله‌دی.
مؤلف نینگ ایتیشیچه، حتا ایتالياده ایش تاپیشگه موفق بۉلگن مهاجرلر هم پست ایش حقی و کسبي رواجلنیش استقبالی‌نینگ یۉقلیگی سببلی مملکتنی ترک اېتیشی ممکن.
باشقه تاماندن، ایتالياده افغان فقرالری‌نینگ باش‌پناه آلیش حالتی هم اۉزگریب بارماقده.
ایتاليا اۉتگن ییللرده افغان مهاجرلری نینگ باش‌پناه سۉراولرینی قبول قیلیش درجه‌سی اروپاده‌گی اېنگ یوقاری دولتلردن بیری بۉلگن. بیراق حساباتگه کۉره، ۲۰۲۵ -ییلده ایجابي قرارلر ۸۲ فایزگچه کمه‌یگن.
شونینگدېک، اروپا اتفاقی نینگ ینگی مهاجرت قاعده‌لری و ایتالیا نینگ ۲۰۲۶-ییلده قبول قیلگن ینگی قانونلری اَیریم عریضه‌لرنی کۉریب چیقیش جریانینی تېزلشتیرگن و «سلبي قرارلرگه شکایت قیلیش امکانیتلرینی ینه‌ده چېکله‌گن».
افغانستان تحلیلچیلر ترماغی ایتالياده‌گی افغان مهاجرلری نینگ مملکت ایچیده‌گی جایلشووی هم اۉزگره‌یاتگنینی ایته‌دی. مثلاً، ۲۰۲۵-ییل آخرلریده پشتو زبان اجتماعي ترماق فعالی تیکتاک آرقه‌لی لعاکویله شهریده یشش حجتلرینی آلیش آسانراق اېکنینی ایتگچ، افغان مهاجرلری نینگ اوشبو شهرگه کیریب کېلیشی و باش‌پناه سۉراولری کېسکین آشگن.
ترماق‌نینگ قۉشیمچه قیلیشیچه، کۉپلب افغان مهاجرلری ایتاليانی آلمان، آسترلیا و اروپا نینگ باشقه مملکتلریگه یېتیب باریش اوچون ترانزیت حدود صفتیده تنله‌یدی. چونکه مهاجرلر او مملکتلرده یخشیراق ایش امکانیتلری همده عایله اعضالری و اجتماعي ترماقلری بیلن یقینراق علاقه‌ده بۉلیش امکانینی ایزله‌یدی.
گزارش مؤلفی فوشینی پراتا شهری نینگ تۉقیمه‌چیلیک حدودیده ایش تاپیشگه بیر نېچه بار اورینگن «یاش و اقتدارلی افغان تیکووچی» حقیده هم یازه‌دی. بو حدودده‌گی استاخانه‌لر نینگ اکثریتی ختایلیکلر تامانیدن باشقه‌ریله‌دی. بیراق اونینگ ایشگه کیریش حقیده‌گی عریضه‌سی هر سفر رد اېتیلگن.
گزارشگه کۉره، او دستلب بونده‌ی مناسبت سببینی بیلمه‌گن. کېینچه‌لیک استاخانه‌لردن بیریگه یقینده ایشگه کیرگن پاکستانلیک تیکووچی اونگه ایش بېرووچیلر اونینگ یشش حجتلرینی کۉریب، او سیاسي قاچقین اېکنینی انگلب یېتگنینی توشونتیرگن. اولر نینگ فکریچه، بونده‌ی شخص ایش قانونچیلیگی بوزیلیشلریگه قرشی ناراضیلیک بیلدیریش احتمالی یوقاری بۉلگن.
پاکستانلیک تیکووچی‌نینگ ایتیشیچه، ایش بېرووچیلر اونی «اۉزلری اوچون معما توغدیریشی ممکن بۉلگن» شخص دېب حسابله‌گن.
حساباتده ۲۰۲۶-ییل جون آییده یوز بېرگن ینه بیر حالت هم مثال صفتیده کېلتیریله‌دی. اۉشه واقعه‌ده اوچ نفر افغان ایشچیسی و بیر نفر پاکستان فقراسی موتر ایچیده یاقیب یوباریلگن. قولوپنای تېریمی اوچون بو شخصلرنی یالله‌گن ایکّی پاکستانلیک فقرا واقعه‌گه علاقه‌دارلیکده عیبلنگن. اوشبو حادثه حق تۉله‌نمه‌گن ایش حقی یاکه عدالتسیز ایش شرایطلریگه قرشی ناراضیلیک بیلدیرگن مهاجر ایشچیلرگه نسبتاً زۉرآورلیک دایره‌سیده کۉریلگن.
فابریتزیو فوشینی نینگ ایتیشیچه، بو مثال «قانوني یشش حجتلریگه اېگه بۉلیش» هر دایم هم ایش امکانیتلریدن فایده‌لنیش امکانینی بېرمسلیگینی کۉرسه‌ته‌دی. بعضاً اېسه بونده‌ی حجتلرگه اېگه بۉلیش ایشگه قبول قیلیش جریانیده کمسیتیشگه سبب بۉلیشی ممکن.
