شنبه کونی هالندنینگ آرنهېم شهریده ۲۹-میزان — اۉزبېک تیلی ملي کونیگه بغیشلنگن طنطنه‌لی تدبیر بۉلیب اۉتدی. اونده هالند، آلمان و اروپانینگ باشقه مملکتلریده استقامت قیلووچی ۱۲۰ کیشیدن آرتیق افغانستانلیک سیاستچیلر، مدنیت و اجتماعي ساحه فعاللری همده انسان حقوقلری حمایه‌چیلری اشتراک اېتدی.
تدبیر «بیرلیک یۉلی» معناسینی انگله‌تووچی بېرلیک یولی سیاسي-اجتماعي حرکتی تشبثی و تشکیلاتچیلیگی بیلن اۉتکزیلدی. اونده تورلی مملکتلردن کېلگن بیلیم یورت و تعلیم ساحه‌سی اۉقیتووچیلری، سابق حربيلر، یازووچیلر، تدقیقاتچیلر و مدنیت فعاللری قتنه‌شدی.
محفل اۉزبېک ملي مدحیه‌سی بیلن باشلندی. مهمانلرنی قوتلش و دستور بیلن تنیشتیریشدن سۉنگ، سۉزگه چیققنلر آنه تیلی‌نینگ اهمیتی، ملي و مدني اۉزلیکنی اسره‌ش همده خارجده‌گی افغانستانلیکلر آره‌سیده بونده‌ی اوچره‌شوولرنینگ اۉرنی حقیده فکر بیلدیردیلر.
سوزلر دوامیده تورکي-اۉزبېک تیلی و ادبیاتی‌نینگ اۉرنی، تورکي عالِملر و حکمدارلرنینگ مدنیت همده تمدن رواجیگه قۉشگن حصه‌سی، تاریخي و مدني میراثنی قَیته اۉرگنیش، بویوک تاریخي شخصلرنینگ قره‌شلریدن اجتماعي و سیاسي حیاتده فایده‌لنیش ضرورلیگی تأکیدلندی. شونینگدېک، سۉنگگی ایکّی عصردن آرتیق دور مابینیده تورکي-اۉزبېک تیلی و مدنیتیگه نسبتاً کۉرسه‌تیلگن اعتبارسیزلیک همده چېکلاولر حقیده سۉز یوریتیلدی.
محفل جریانیده اۉزبېک تیلی ملي کونی مناسبتی بیلن بیر قطار سیاسي، مدني و حقوقي ساحه فعاللری‌نینگ تبریک پیاملری اۉقیب اېشیتتیریلدی. شونینگدېک، علمي و مدني جماعتچیلیک وکیللری‌نینگ ویدیولری نمایش اېتیلدی.
تدبیرنینگ ینه بیر قِسمی (تولد در دل آتش) ناملی خاطره کتابی‌نینگ تقدیماتیگه بغیشلندی. اونده مؤلف نینگ سابق جمهوریت دوریده‌گی باشقروو تیزیمی و موجود معمالر حقیده‌گی خاطره‌لری تینگلندی.
محلي موسیقی اجرالری، شعرلر اۉقیلیشی، خطاطلیک و حسن خط کۉرگزمه‌سی، شونینگدېک، تورلی اۉزبېک ملي طعاملری و شیرینلیکلری نینگ تقدیم اېتیلیشی بیره‌مگه اۉزگه‌چه فیض بغیشله‌دی. اوشبو چیقیشلر و کۉرگزمه‌لر مهمانلرده کتّه تأثرات قالدیردی.
تدبیر یکونیده یریم عصردن آرتیق علمي و اجتماعي-سیاسي فعالیتی اوچون اوچ نفر مدنیت و سیاست اربابی فخري یارلیقلر بیلن تقدیرلندی.
بیره‌م تشکیلاتچیلر و مهمانلرگه بیلدیریلگن منّتدارلیک همده اۉزبېک ملي طعاملری، خصوصاً، اۉزبېکچه پلو تارتیلیشی بیلن یکونلندی.
تشکیلاتچیلرنینگ تأکیدلشیچه، بونده‌ی تدبیرلرنینگ اساسي مقصدی اۉزبېک تیلی و مدنیتینی اسره‌ش، خارجده‌گی افغانستانلیکلر اۉرته‌سیده‌گی مدني علاقه‌لرنی مستحکملش همده تیل و تاریخي میراثنی کېله‌جک اولادلرگه یېتکزیشدن عبارت.
