۲۹ میزان، اۉزبېک تیلی ملي کونی مناسبتی بیلن ایران پایتختی تهران شهریده‌گی خوارزمی بیلیم یورتیده افغانستانلیک بیر گروه یازووچیلر، شاعرلر، ضیالیلر و طلبه‌لر اشتراکیده تدبیر اۉتکزیلدی.
تدبیر افغانستان محصللر اویوشمه‌سی همده ایرانده استقامت قیله‌یاتگن فاریابلیک محصللر اشتراکیده تشکیل اېتیلدی. اونده اشتراکچیلر اۉزبېک تیلی و ادبیاتی نینگ اهمیتی، شونینگدېک، بو تیلنی اسره‌ب-اوه‌یلش و رواجلنتیریش ضرورلیگی حقیده فکر بیلدیردیلر.
محفل‌ده افغانستان‌نینگ تنیقلی یازووچیسی و شاعری دوکتور محمد کاظم امینی، خوارزمی بیلیم یورتیده‌گی افغانستان محصللری اویوشمه‌سی رئیسی همده بیر گروه محصللر اۉزبېک تیلی‌نینگ موقعیی، اونینگ ادبي تاریخی و یاش اولاد نینگ بو تیلنی اسره‌ب-اوه‌یلش همده رواجلنتیریشده‌گی رۉلی حقیده سۉزله‌دیلر.
تدبیرنینگ ینه بیر قِسمیده بیر قطار شاعرلر و اشتراکچیلر اۉزبېک تیلیده‌گی شعرلرینی اۉقیب بېردیلر.
شونینگدېک، محفل دوامیده اۉزبېک تیلیده یقینده نشر اېتیلگن بیر قطار کتابلر نمایش اېتیلدی. اۉزبېکلرنینگ ملي طعاملری هم اوشبو خلق‌نینگ مدنیتی و مدني میراثی‌نینگ بیر قِسمینی تنیشتیریش مقصدیده کۉرگزمه‌گه قۉییلدی.
تدبیر تشکیلاتچیلری‌نینگ ایتیشیچه، اوشبو تدبیردن کۉزلنگن مقصد اۉزبېک تیلی ملي کونینی نشانلش، اۉزبېک تیلی‌نینگ ادبي و مدني صلاحیتینی نمایش اېتیش همده یاش اولادنینگ اۉزبېک تیلی و ادبیاتینی اسره‌ب-اوه‌یلش و رواجلنتیریشگه بۉلگن اعتبارینی کوچه‌یتیریشدن عبارت.
