طالبلر رهبری هبت‌الله آخوندزاده بو گروه جنگریلریدن «قومچیلیک و گروهبازلیک»دن اوزاق بۉلیشنی سۉره‌دی.
طالبلر سوزلاوچیلری‌نینگ معلوم قیلیشیچه، گروه رهبری بو سۉزلرنی قندهارده‌گی ۲۰۵-البدر قول اردوسیده قیلگن نطقی چاغیده ایتگن.
ملا هبت‌الله طالبلر جنگریلریگه شونده‌ی دېگن: «اۉزارا بیرلیک و هم‌جهتلیکده بۉلینگلر همده قومچیلیک و گروهبازلیکدن اوزاق بۉلینگلر. شخصي منفعتلرینگیزنی تیزیم یۉلیده قربان قیلینگلر و تقوا همده دیندارلیکنی اۉزلرینگیزگه عادت قیلینگلر.»
طالبلر رهبری اۉز نطقلریده دایما بو گروه صفیده بیرلیک و هم‌جهتلیکنی تأمینلش، قومچیلیکدن اوزاق بۉلیشگه اورغو بېریب کېله‌دی. بیراق طالبان تنقیدچیلری نینگ فکریچه، بو گروه‌نینگ باشقروو توزیلمه‌سی قومچیلیک و اېتنیک یقّال نمونه‌سیدیر.
حاضرده طالبلر حکومتیده‌گی منصبدارلر و خادملرنینگ دېیرلی برچه‌سی اوشبو گروه اعضالری بۉلیب، اساسن پشتونلردن عبارت. باشقه تاماندن، اوشبو گروه حکومتیده‌گی پشتون بۉلمه‌گن آزچیلیک وکیللری‌نینگ ناراضیلیگی حقیده منتظم روشده خبرلر ترقه‌لیب کېلماقده.
طالبلر سۉنگگی بېش ییل دوامیده بو خبرلرنی رد اېتیب کېلگن بۉلسه-ده، کمیده ایکّی نفر ناراضی پشتون بۉلمه‌گن قوماندانینی لوازمیدن چېتله‌تگن.
طالبلر رهبری اۉز نطقی‌نینگ دوامیده اوشبو گروه قول اردوده طالبان اعضالریدن دولت ملکی، موترلر و قوراللردن فایده‌لنیشده جوده احتیاط بۉلیشنی همده اولردن نااۉرین فایده‌لنمسلیکنی سۉره‌گن.
او طالبلر اعضالریگه نمازنی اېنگ یخشی طرزده ادا اېتیش، اونینگ برچه روکنلری و شرطلرینی بجریشنی توصیه قیلگن.
طالبلر رهبری شونده‌ی دېگن: «مجاهد دین نینگ برچه ساحه‌لری حقیده بیلیمگه اېگه بۉلیشی، اخلاق و اسلامي آدابلرنی اۉزیده عملده قۉللشی کېره‌ک، چونکه آدملر اولرگه اېرگشه‌دیلر.»
طالبلر جنگریلری، بو گروه اولرنی «مجاهدلر» دېب اته‌یدی، اساسن سوادسیز یاکه دیني مدرسه‌لرنی تمامله‌گن کیشیلردن عبارت.
بو گروه سۉنگگی بېش ییل دوامیده افغانستان‌ده شریعت نامی آستیده قتّيق چېکلاولرنی جاري اېتدی. بونده‌ی چېکلاولرنینگ اسلامي مملکتلرده مثلی کۉریلمه‌گن.
