بیرلشگن ملتلر تشکیلاتی‌نینگ افغانستانده‌گی انسان پرورلیک یاردملرنی موافقلشتیریش اداره‌سی (اوچا) نینگ معلوم قیلیشیچه، طالبلرنینگ اره‌لشووی و چېکلاولری سبب مملکت غربیده عیاللر و قیزلر نینگ خدمتلردن فایده‌لنیش امکانیتی معمالرگه دوچ کېلماقده.
اوچانینگ بوگون (شنبه، ۲ عقرب) نشر قیلینگن یاردم کۉرسه‌تیش حالتی حقیده‌گی گزارشیده ایتیلیشیچه، سپتامبر آییده اۉتکزیلگن سۉراوده قتنه‌شگن انسان پرورلیک یاردم تشکیلاتلری نینگ قریب ۹۰ فایزی غربي حدودده عیاللر و قیزلرنینگ خدمتلردن فایده‌لنیشیده معمالر موجودلیگینی بیلدیرگن.
اوچاگه کۉره، ۱ مارچ‌دن کوچگه کیرگن طالبلرنینگ ینگی چېکلاولری کۉریب چیقیلگن جمعی ۱۳۶ لایحه نینگ ۲۶ ته‌سی یاپیلیشی، توخته‌تیلیشی، فعالیت دایره‌سی قیسقه‌رتیریلیشی یاکه ایش باشلشیگه تۉسقینلیک قیلینیشیگه سبب بۉلگن. بو کۉریب چیقیلگن لایحه‌لر نینگ ۱۹ فایزینی تشکیل اېته‌دی.
اوچا گزارشیده قید اېتیلیشیچه، یاردم آلیش امکانیتی بیلن باغلیق حادثه‌لرنینگ قریب یرمی افغانستان نینگ غربي حدودیدن قید اېتیلگن.
گزارشده ایتیلیشیچه، انسان پرورلیک یاردم کۉرسه‌تیش امکانیتلری بیلن باغلیق محیطگه، اساسن، عیاللرنینگ گومانیتار عملیاتلرده‌گی اشتراکیگه قۉییلگن چېکلاولر و اره‌لشوولر تأثیر کۉرسه‌تیشده دوام اېتماقده.
گزارشگه کۉره، انسان پرورلیک یاردم همکارلری سپتامبر آییده افغانستان بۉیلب جمعی ۳۰ ته یاردم آلیش امکانیتی بیلن باغلیق حادثه‌نی قید اېتگن. بو اگوست آییگه نسبتاً ۲۷ فایزگه کمدیر. بیراق اوچانینگ تأکیدلشیچه، قید اېتیلگن حادثه‌لر سانی‌نینگ کمه‌ییشی گومانیتار یاردمدن فایده‌لنیش امکانیتی یخشیلنگنینی انگله‌تمه‌یدی، چونکه اَیریم حادثه‌لرنینگ قید اېتیلمه‌ی قالیشی همان معما بۉلیب قالماقده.
اوچاگه کۉره، قید اېتیلگن ۳۰ته حادثه نینگ ۱۸ ته‌سیده انسان پرورلیک فعالیتلرنی عملگه آشیریشگه اره‌لشوو اساسي کیریش تۉسیغی بۉلگن.
اوچانینگ قۉشیمچه قیلیشیچه، باشقه حالتلر جسماني محیط، تۉقنه‌شوولر و حربي عملیاتلر، گومانیتار خادملرگه نسبتاً زۉرآورلیک و اوشبو ساحه خادملری نینگ حبسگه آلینیشی، شرطنامه‌لرنی امضالشده‌گی کېچیکیشلر همده اهالی‌نینگ اساسي احتیاجلردن فایده‌لنیش امکانیتیدن محروم اېتیلیشی بیلن باغلیق بۉلگن.
اوشبو اداره‌نینگ معلوم قیلیشیچه، یاردم کۉرسه‌تیش اۉپراسیون‌لری جریانیده حادثه‌لرنینگ جیغرافیه تقسیماتی نامتناسب بۉلیب، اولرنینگ اېنگ کۉپ سانی غربي حدودده قید اېتیلگن. بو حدودده ۱۵ ته حادثه، یعنی مملکت بۉییچه جمعی حادثه‌لر نینگ ۴۷ فایزی قید اېتیلگن. اوندن کېینگی ا‌ۉرینده ۶ ته حادثه یاکه ۵۰ فایز بیلن مرکزي حدود توره‌دی. شرقي و جَنوبي حدودلرنینگ هر بیریده ۳ته‌دن، جَنوبی-شرقي و شمالي حدودلرنینگ هر بیریده اېسه ۲ ته‌دن حادثه قید اېتیلگن.
اوچانینگ ایتیشیچه، غربي حدودده یاردمدن فایده‌لنیش امکانیتی‌نینگ یامانلشووی حکمران حاکمیت وکیللری‌نینگ، اینیقسه، جندر بیلن باغلیق چېکلاولر دایره‌سیده‌گی اره‌لشوولری بیلن باغلیق. بو اره‌لشوولر آره‌سیده امر به معروف و نهي از منکر وزیرلیگی تامانیدن گومانیتار تشکیلاتلرگه، جمله‌دن، لایحه عملگه آشیریله‌یاتگن جایلر و اوشبو تشکیلاتلرنینگ اداره‌لریگه تشریفلرنینگ کۉپه‌ییشی هم بار. بو اېسه اولر نینگ فعالیتیگه قۉشیمچه چېکلاولر جاري اېتیلیشیگه آلیب کېلگن.
طالبلر دولت و نادولت تشکیلاتلرده، جمله‌دن، بیرلشگن ملتلر تشکیلاتیده عیاللرنینگ ایشلشینی تعقیقله‌گن. بیرلشگن ملتلر تشکیلاتی‌نینگ تأکیدلشیچه، اوشبو تعقیق یاردملرنی تقسیملش جریانینی قیینلشتیرگن. بیرلشگن ملتلر تشکیلاتی‌نینگ عیاللر و قیزلرگه یاردم یېتکزیش اوچون عیال گومانیتار خادملر نینگ موجودلیگی ضرورلیگینی بیلدیرگن.
