بیرلشگن ملتلر تشکیلاتی‌نینگ باله‌لر جمغرمه‌سی (یونیسف) حاضرده افغانستانگه انسان پرورلیک یاردملر اۉزبېکستان آرقه‌لی یېتکزیله‌یاتگنینی معلوم قیلدی.
یونیسف‌نینگ افغانستانده‌گی نماینده‌لیگی باشلیغی تاج‌الدین اویاله بوگون (یک‌شنبه، ۳ عقرب) ایکس اجتماعي ترماغیده ویدیو نشر قیلیب، اوشبو تشکیلات اۉزبېکستان‌نینگ ترمذ شهریده کمپ و تأمینات مرکزینی تشکیل اېتگنی همده یاردملرنی اوشبو مرکز آرقه‌لی افغانستانگه یوباره‌یاتگنینی ایتدی.
اونینگ ایتیشیچه، مذکور مرکز یونیسفگه افغانستان‌ده تۉییب طعاملنمه‌یاتگن باله‌لر اوچون آذوقه‌وي دوالش واسطه‌لریدن فایده‌لنیش امکانیتی‌نینگ اوزلوکسیزلیگینی تأمینلش امکانینی بېره‌دی.
یونیسف نماینده‌لیگی قۉشیمچه قیلیب، جاري ییلده افغانستان‌ده ۳.۷ میلیون باله تۉییب طعاملنمسلیکدن اذیت چېکه‌یاتگنینی، اولردن بیر میلیونی دوالنیشگه محتاجلیگینی ایتدی.
تاج‌الدین اویاله‌نینگ تأکیدلشیچه، اۉزبېکستان‌ده تشکیل اېتیلگن مرکز اولرگه اوشبو باله‌لرنی دوالش امکانینی بېره‌دی.
بو حالت افغانستان و پاکستان اۉرته‌سیده‌گی چېگره اۉتیش پونکتلری یاپیلگنی، شونینگدېک، ایران و امریکا اوروشی آرتیدن هرمز بۉغازی یاپیلگنی سببلی افغانستانگه انسان پرورلیک یاردملرنی یېتکزیش هم قیینلشگن بیر پیتده یوز بېرماقده.
بوندن آلدین بیرلشگن ملتلر تشکیلاتیگه قره‌شلی جهان آزیق-طعام دستوری افغانستانگه آزیق-طعام یاردملری حاضرده سکّیز دولت حدودیدن اۉتیب یېتیب کېله‌یاتگنینی، بونینگ عاقبتیده یېتکزیب بېریش خرجتی و وقتی سېزیلرلی درجه‌ده آشگنینی معلوم قیلگن اېدی.
