ایران تشقی ایشلر وزیری عباس عراقچی: «اوروش بۉله‌دیمی یاکه بۉلمه‌یدیمی، بیزنینگ سیاستلریمیز اۉز جاییده قاله‌دی»، دېدی.
عراقچی بوگون (یک‌شنبه، ۲۵-اکتوبر) تهرانده بۉلیب اۉتگن ییغیلیشده: «اگر عقل-ادراک اوستون کېلسه، اولر ایران خلقیگه قرشی حربي تجاوزنی ینه تکرارله‌مه‌یدیلر»، دېدی.
ایکّی کون اوّل امریکا جمهور رییسی دونالد ترامپ فلوریداده‌گی ییغیلیشده ایرانگه قرشی ینه هجوملر اویوشتیریلیشی ممکنلیگینی ایتیب: «ینه «حماسی خشم» توریده‌گی کیچیکراق عملیات اۉتکزیشیمیز ممکن یاکه اولر کېلیشووگه اېریشه‌دی»، دېدی.
ترامپ قۉشیمچه قیلدی: «اگر [اېران رسميلری] عقللی بۉلسه، شونچه‌که «کېلینگ، اساسي مسأله‌گه اۉته‌یلیک»، دېییشه‌دی. اما اولر بونده‌ی قیلیشیگه شبهه قیله‌من، چونکه اولر اونچه‌لیک عقللی بۉلمسلیگی ممکن.»
امریکا و ایران قیرق کونلیک اوروشدن سۉنگ پاکستان واسطه‌چیلیگیده اوروشنی توگه‌تیش بۉییچه کیلیشووگه اېریشگن اېدی. بیراق ایکّی تامان‌نینگ هرمز بۉغازی باره‌سیده‌گی کېلیشماوچیلیگی اوشبو کیلیشونینگ برباد بۉلیشیگه و تۉقنه‌شوولرنینگ قَیته باشلنیشیگه سبب بۉلدی.
سۉنگگی هفته‌لرده امریکا و ایران اۉرته‌سیده‌گی تۉقنه‌شوولر توخته‌گن بۉلسه-ده، ینگی ماجرا یوزه‌گه کېلیشی احتمالی همان محاکمه قیلینماقده.
عراقچی بوگونگی نطقیده هرمز بۉغازی حقیده گپیرر اېکن، بو بۉغاز اۉنلب ییللر دوامیده آچیق بۉلگنینی و بۉغاز ساحلیده‌گی ایکّی دولت — ایران و عمان — کېمه‌لر قتناویگه هېچ قنده‌ی تۉسقینلیک قیلمه‌گنینی، عکسینچه، اونینگ خوفسیزلیگی و برقرارلیگینی تأمینلب، اطراف-محیطنی محافظه قیلگنینی ایتدی. بیراق اونینگ تأکیدلشیچه، هرمز بۉغازینی باشقریش اوّلگیدېک بۉلمه‌یدی.
او منطقه خوفسیزلیگی حقیده گپیرر اېکن، تهران منطقه‌ده ایچکی، یعنی منطقه دولتلری‌نینگ اۉزی تامانیدن و تشقی اره‌لشووسیز تأمینلنه‌دیگن تینچلیک و برقرارلیک بۉلیشی کېره‌ک، دېب حسابلشینی ایتدی.
عراقچی: «منطقه‌میزده‌گی امریکا حربي بازه‌لری هېچ کیمگه تینچلیک و خوفسیزلیک آلیب کېلمه‌دی. بو بازه‌لرگه مېزبانلیک قیلگن مملکتلرگه هم تینچلیک و خوفسیزلیک آلیب کېلمه‌دی، عکسینچه، عیناً شو بازه‌لر اولرنینگ خوفسیزلیگیگه تهدید سببلریدن بیری بۉلدی»، دېدی.
او قۉشیمچه قیلدی: «منطقه‌میز اۉز تینچلیگی و برقرارلیگینی تأمینلش اوچون خارجي کوچلرنینگ موجودلیگی صفرگه توشه‌دیگن تامانگه حرکت قیلیشی کېره‌ک.»
ایران رسميسی تأکیدله‌دی: «منطقه‌ده‌گی برچه مسأله‌لر بیر-بیری بیلن چنبرچس باغلیق. منطقه‌نینگ بیر چېتیده اوروش و ماجرا دوام اېتیب، باشقه بیر چېتیده تینچلیک بۉلیشینی کوتیب بۉلمه‌یدی. پاکستان، قطر و باشقه تامانلرنینگ واسطه‌چیلیگیده امریکالیکلر بیلن آلیب بارگن برچه مذاکره‌لریمیزده برچه جبهه‌لرده اوروش یکونلنیشی کېره‌کلیگینی تأکیدله‌دیک. عکس حالده، منطقه‌ده برقرارلیکنی تأمینله‌ی آلمه‌یمیز.»
