طالبان ایچکی ایشلر وزیرلیگی افغانستان نینگ نیمروز ولایتیده‌گی پل ابریشم چېگره بندری همده ایران‌نینگ سیستان و بلوچستان ولایتیده‌گی مِیلک چېگره پونکتی آرقه‌لی ترانزیت موترلر قتناوی ۲۴ ساعتلیک ترتیبگه اۉتکزیلگنینی معلوم قیلدی.
اوشبو وزیرلیک بوگون (دوشنبه، ۴ عقرب) بیانات ترقه‌تیب، «بو چاره ترانزیت جریانینی یېنگیللشتیریش، تجاري یوکلرنی تشیشنی تېزلشتیریش همده هیداوچیلر و سوداگرلر اوچون کۉپراق قوله‌یلیکلر یره‌تیش مقصدیده عملگه آشیریلگنینی» بیلدیردی.
طالبلر ایچکی ایشلر وزیرلیگی‌نینگ معلوم قیلیشیچه، بوندن اوّل اوشبو یۉنه‌لیش آرقه‌لی کونیگه ۴۰۰ته موتر قتنه‌گن بۉلسه، حاضر بیر کیچه و کوندوز دوامیده ایمپورت و اېکسپورت یوکلرینی تشووچی ۸۰۰ ته موتر اوشبو یۉنه‌لیش آرقه‌لی حرکتلنماقده.
ایران رسميلری حاضرچه اوشبو یۉنه‌لیش‌نینگ ۲۴ساعتلیک ترتیبده ایشلشیگه مناسبت بیلدیرمه‌گن.
اوّلراق ایران عاموی اخبارات واسطه‌لری ایران و افغانستان‌نینگ قۉشمه اقتصادي ییغیلیشیده اوشبو یۉنه‌لیش فعالیتینی بیر آی دوامیده ۲۴ساعتلیک ترتیبده یۉلگه قۉییش حقیده کېلیشیب آلینگنی حقیده خبر بېرگن اېدی.
ایران طالبلر افغانستانده قَیته حاکمیتنی اېگه‌لله‌گنیدن سۉنگ افغانستانگه تاور صادر قیلووچی اېنگ ییریک دولتگه ایلندی. اوشبو تاورلرنینگ سلماقلی قِسمی سیستان و بلوچستان ولایتیدن مِیلک–پل ابریشم یۉنه‌لیشی آرقه‌لی افغانستانگه وارد قیلینه‌دی
