بیرلشگن ملتلر تشکیلاتی‌نینگ اوی جای دستوری «جهان شهرلر کونی» عرفه‌سیده نشر قیلگن پیامیده کابل تېگیشلی قۉللب-قوّتلش بیلن میلیونلب انسانلر اوچون جاذبه‌دار و گُللب-یه‌شنه‌گن مسکنگه ایلنیشی ممکنلیگینی بیلدیردی.
اوّلراق هم اوشبو تشکیلات بیر قطار گزارشلرنی اعلان قیلیب، افغانستانده جمهوریت باشقرووی دوریده‌گی ییگیرمه ییل دوامیده شهرلشوو درجه‌سی آشگنی، شهرلر اېسه ترتیبسیز روشده و ضرور تاسیساتلر کېنگه‌ییب بارگنینی معلوم قیلگن اېدی.
بیرلشگن ملتلر تشکیلاتی‌نینگ گزارشیگه کۉره، ۲۰۲۴-ییلده افغانستان نینگ شهر اهالیسی قریب ۱۱.۴ میلیون کیشیگه یېتگن. سۉنگگی ایکّی ییل ایچیده پاکستان و اېراندن میلیونلب افغان مهاجرلری‌نینگ مجبوري روشده چیقریب یوباریلیشی آرتیدن شهر اهالیسی ینه‌ده کۉپه‌یگن.
بیرلشگن ملتلر تشکیلاتی ۲۰۲۴-ییلده افغانستان اهالیسی نینگ ۲۷ فایزدن آرتیغی شهرلرده یششینی معلوم قیلگن اېدی. اېنگ کۉپ شهر اهالیسی یشه‌دیگن کابل و هرات شهرلری تېزکار شهرلشوو همده اقلیم اۉزگریشی عاقبتیده یوزه‌گه کېله‌یاتگن باسیمگه دوچ کېلماقده.
مهاجرت، مهاجرلر نینگ قَیتیشی، قیشلاقلرده‌گی قشّاقلیک و ایشسیزلیک، شونینگدېک، قورغاقچیلیک و سوو تاشقینلری کبی طبيعي آفتلر افغانستانده شهرلشوو نینگ کوچه‌ییشیگه سبب بۉله‌یاتگن عامللر حسابلنه‌دی.
