ایران رهبری مجتبی خامنه‌ای مملکت قوراللی کوچلری قوماندانلری بیلن اوچره‌شووده «هر قنده‌ی درجه و تورده‌گی تهدیدگه زودلیک بیلن، تأثیرچن و جیوگرافیک چېکلاولرسیز جواب بېریلیشی کېره‌ک»، دېگن.
ایسنا خبریگه کۉره، ایران رهبری «اگر دشمنلر ینه حربي یاکه ترورچیلیک هجوملرینی باشله‌سه، اونینگ قچان و قنده‌ی شرایطده یکونلنیشینی ایران اسلام جمهوریتی قوراللی کوچلری همده ای ان خلقی بېلگیله‌یدی»، دېیه تأکیدله‌گن.
مجتبی خامنه‌ای «دشمنلرگه قرشی کوچلی جواب بېریشگه شَی بۉلگن عاقلانه جنگاور تیارگرلیک»نی «ماکسیمال درجه‌ده‌گی تيیب توریش» سیاستی‌نینگ ضرور شرطلریدن بیری دېب اته‌گن.
او ای ان قوراللی کوچلری‌نینگ حربي اخبارات مستحکملش، مدافعه و تاکیتیکی ساحه‌لریده محلي مدافعه صلاحیتینی چوقورلشتیریش، زمانه‌وي مدافعه و خوفسیزلیک امکانیتلرینی رواجلنتیریش همده قوراللی کوچلرنینگ معنوي صلاحیتی و جهادي روحیتینی مستحکملشگه اورغو بېرگن.
بو مجتبی خامنه‌ای‌نینگ ایران قوراللی کوچلری قوماندانلری بیلن ایلک اوچره‌شوویدیر.
او هجوملرگه زودلیک بیلن جواب بېریش حقیده بویروق بېرگن بیر پیتده، سۉنگگی کونلرده امریکا‌نینگ ایرانگه ینه هجوم قیلیشی احتمالی حقیده کۉپلب خبرلر ترقه‌لگن.
مجتبی خامنه‌ای آته‌سی اۉتگن ییل نینگ ۹-حوت سنه‌سیده امریکا و اسرایل هجوملری عاقبتیده هلاک بۉلگنیدن سۉنگ ایران رهبری اېتیب تعیینلنگن.
او حاضرگچه جماعت آلدیده کۉرینمه‌گن و فقط اَیریم یوقاری مرتبه‌لی ایران رسميلری بیلن اوچره‌شگن
