امریکا کانگرسی‌نینگ آلتی اعضاسی مملکت تشقی ایشلر وزیرلیگی و ایچکی خوفسیزلیک وزیرلیگیدن افغانستانلیک و ایرانلیک مهاجرلرنی دېپورت قیلیش رېجه‌لشتیریلگن پروازلرنی بېکار قیلیشنی سۉردی.
اولر دوشنبه کونی (۱۱عقرب) یازگن قۉشمه مکتوبیده افغانستانلیک فقرالرنی طالبلر حکمرانلیگی آستیده‌گی حدودگه قَیتریش اولرنینگ حیاتینی خوف آستیگه قۉییشی، شونینگدېک، اولرنینگ تعقیب، قییناققه سالینیشی و حتا اۉلدیریلیشیگه زمین یره‌تیشی ممکنلیگیدن آگاهلنتیرگن.
امریکا نماینده‌لر اسکات اچ. پیترز، جیمی راسکین و خوان وارگاس، اعضای مجلس نمایندگان امریکا؛ جک رید، مارک کلی و آدام بی. شیف اوشبو مکتوبنی امریکا قوشمه ایالتلری تشقی ایشلر وزیری کاتبی مارکو روبیو و ایچکی خوفسیزلیک وزیری مارکو وین ویلینگ‌گه یوبارگن.
مکتوب امضالاوچیلری یقین کونلرده ۱۵۰ نفردن آرتیق افغانستانلیک فقرا دېپورت قیلینیشی ممکنلیگی حقیده‌گی خبرلرگه اشاره قیلیب، دېپورت قیلینیشی کوتیله‌یاتگن اَیریم شخصلر امریکا حربيلری بیلن همکارلیک قیلگن کیشیلر نینگ قرینداشلری بۉلیشی ممکنلیگینی ایتگن.
اولر بونده‌ی چاره‌نی افغانستانده امریکا کوچلرینی قۉللب-قوّتله‌گن و بو نینگ اوچون اۉزلری همده عایله‌لری‌نینگ خوفسیزلیگینی خوف آستیگه قۉیگن انسانلرگه نسبتاً «امریکا نینگ وعده‌سی و اخلاقي مجبوريتلرینی بوزیش» دېب بهاله‌گن.
مکتوب امضالاوچیلری امریکا حکومتی و حربي کوچلری بیلن همکارلیک قیلگن شخصلر اوچون افغانستان همان «خوفلی» مملکت اېکنینی، اولر نینگ کۉپچیلیگی مملکتگه قَیتریلگن تقدیرده «تعقیب، تضییق، قییناقلر یاکه اۉلیم» خوفیگه دوچ کېلیشینی تأکیدله‌گن.
اولر، شونینگدېک، افغانستانده‌گی عیاللر، طالبانگه قرشی سیاسي مخالفلر و جنسي آزچیلیکلر وکیللری نینگ احوالیگه اشاره قیلیب، دېپورت قیلینه‌یاتگنلر آره‌سیده عیاللر و باشقه حمایه‌گه محتاج شخصلر بۉلیشی ممکنلیگیدن خواطر بیلدیرگن.
مکتوبده ایرانلیک فقرالر، جمله‌دن، عیاللر، عیسويلیکنی قبول قیلگنلر و دېموکراسی طرفداری بۉلگن فعاللر دېپورت قیلینیشی ممکنلیگیدن هم خواطر بیلدیریلگن.
مکتوب امضالاوچیلری دوام اېته‌یاتگن حربي ماجرا و ایران حکومتیگه قرشی مخالفلرنی باستیریش شرایطیده بو شخصلرنی اېرانگه قَیتریشنی «قبول قیلیب بۉلمه‌یدیگن» حالت دېب اته‌گن.
اولر، شونینگدېک، پاکستان حکومتیدن افغانستانلیک مهاجرلرنی طالبلرگه تاپشیریشده همکارلیک قیلمسلیکنی سۉره‌گن. کانگرس اعضالری قۉشمه مکتوبیده پاکستانگه آگاهلنتیریش بېریب، شخصلرنی قییناققه یاکه اۉلیمگه آلیب باره‌دیگن طرزده تاپشیریشده اشتراک اېتگن منصبدارلر امریکانینگ انسان حقوقلری بۉییچه چېکلاولریگه دوچ کېلیشی ممکنلیگینی بیلدیرگن.
ایکّی کون اوّل هم افغانستانلیک مهاجرلر نینگ پاکستانگه دېپورت قیلینیشی حقیده‌گی خبرلر ترقه‌لگچ، امریکانینگ بیر گروه سناتورلری اولرنی دېپورت قیلیشنی «شفقتسیز» و «اقش اتفاقچیلریگه خیانت» دېب اته‌ب، کانگرسنی دونالد ترامپ‌دن حکومتی قراریگه قرشی توریشگه چقیرگن اېدی.
جن شاهین، سناتور نیوهمپشایر، کریس کونز، سناتور ایالت دلاور، ریچارد بلومنتال، سناتور کنتیکت و تم کین، سناتور ویرجینیا کېین علیحده بیاناتلریده افغانستانلیک مهاجرلر نینگ پاکستانگه دېپورت قیلینیشینی بېکار قیلیشگه چقیرگن.
بو آره‌ده «نیویارک تایمیز» جمعه کونی (۸ عقرب) امریکا حکومتی لوئیزیانا شتاتیده ۱۵۰ نفردن آرتیق افغانستانلیک باش‌پناه ایزلاوچینی حبسگه آلگنی و اولرنی پاکستان حکومتی همکارلیگیده اوچ کون ایچیده دېپورت قیلیشنی رېجه‌لشتیره‌یاتگنی حقیده خبر بېرگن.
