ایران تشقی ایشلر وزیری عباس عراقچی امریکا جمهور رئیس اۉرین باسری جې دی ونس‌نینگ ایران ملي خوفسیزلیک عالي کېنگشی کاتبی محسن رضاییگه یوبارگن مکتوبی «دقّت بیلن اۉرگنیلگنی و یوقاری درجه‌ده‌گی ییغیلیشلرده محاکمه قیلینگنینی» ایتدی.
ایران تشقی ایشلر وزیری بوگون، شنبه کونی (۹ عقرب)، «الجزیره» تلویزیونیگه بېرگن صحبتیده: «امریکا تامانی نینگ کېنگراق مقیاسده ملاقات و اۉزارا انگلشوو اېشیگینی آچیشگه اورینیشی ایجابي قدمدیر»، دېدی.
بیراق او: «اگر واشنگتن‌نینگ بو مکتوبنی یوباریشدن مقصدی بۉلینیش و اختلاف یره‌تیش بۉلسه، بو اولر نینگ اوّلگی خطالریگه قۉشیله‌دیگن ینه بیر خطا بۉله‌دی»، دېیه قۉشیمچه قیلدی.
بوندن آلدین «وال استریت ژورنال» گزیته‌سی امریکا جمهور رئیس اۉرین باسریی ایران ملي خوفسیزلیک عالي کېنگشی کاتبیگه مکتوب یوبارگنی و تهراننی مذاکره‌لرنی قَیته باشلش همده هستوي مجبوريتلریگه قَیتیشگه چقیرگنینی خبر قیلگن اېدی.
خبرلرگه کۉره، مذکور مکتوب اۉتگن یکشنبه کونی قطر واسطه‌چیلری آرقه‌لی محسن رضاییگه تاپشیریلگن. حاضرگچه مکتوب‌نینگ مضمونی رسماً اعلان قیلینمه‌گن.
عراقچی، شونینگدېک، حاضرچه امریکا و ایران رسميلری اۉرته‌سیده اوچره‌شوو اۉتکزیش رېجه‌سی یۉقلیگینی و بو حقده‌گی خبرلر اساسسیز اېکنینی ایتدی.
اېران تشقی ایشلر وزیری قطر واسطه‌چیلری بیلن دوحه‌ده مذاکره‌لر دوام اېته‌یاتگنینی و ایران هیئتی دوحه‌گه یۉل آلگنینی بیلدیردی.
او مذاکره‌لر مضمونی حقیده گپیرر اېکن، «واسطه‌چیلر هستوي مسأله بۉییچه اَیریم تکلیفلرنی تقدیم اېتیشدی. حاضر بیز ایکّینچی باسقیچ‌نینگ بیر قِسمی صفتیده بو تکلیفلرنی کۉریب چیقماقده‌میز»، دېدی.
عراقچی قطرنینگ ایران تامانیدن هرمز بۉغازینی قَیته آچیش رېجه‌سی اجراسینی بېش کونگچه قیسقرتیریشنی تکلیف قیلگنینی ایتدی و «بو باسقیچده اجرا مدتینی ایکّی کونگچه قیسقرتیریش بۉییچه تکلیفگه کېلگنمیز»، دېیه قۉشیمچه قیلدی.
او ایران‌ینگ امریکا بیلن مذاکره‌لر آلیب باریش شرطلری حقیده هم شونده‌ی دېدی: «بیز نینگ شرطلریمیز اسلام آباد شرطنامه‌سی امضالنگنیدن کېین جاري اېتیلگن چېکلاولرنی بېکار قیلیش همده امریکا نینگ منطقه‌ده‌گی حربي کوچلرینی قیسقرتیریشنی اۉز ایچیگه آله‌دی. بیز نفت اېکسپورتیگه بېریلگن امتیازلرنی تیکلش و اېران‌نینگ برچه موزله‌تیلگن اکتیولرینی، جمله‌دن، قترده‌گی مبلغلرنی هم آزاد قیلیشنی طلب قیله‌میز.»
ایران تشقی ایشلر وزیری، شونینگدېک، ایران و عمان تامانیدن هرمز بۉغازیده یره‌تیلگن کېمه‌لر قتناوی یۉنه‌لیشی‌نینگ تن آلینیشینی و باشقه یۉنه‌لیشلر نینگ یاپیلیشینی طلب قیلدی. او: «هرمز بۉغازی‌نینگ بیز بېلگیله‌گن شرطلر اساسیده قَیته آچیلیشی واشنگتن بیلن حل قیلینمه‌گن مسأله‌لر بۉییچه مذاکره‌لرنی قَیته باشلش اوچون یۉل آچه‌دی»، دېدی.
امریکاده آره‌لیق سیلاولر یقینلشر اېکن، واسطه‌چیلرنینگ ایران و امریکانی مذاکره‌لر چوکییگه قَیتریش باره‌سیده‌گی سعی-حرکتلری کوچه‌یماقده.
قطر واسطه‌چیلری کېچه ایران رسميلری بیلن مصلحتلشوولر اۉتکزیش اوچون تهرانگه بارگن اېدی. ایتیشلریچه، اولر ایران رسميلری بیلن ۱۲ ساعتلیک مذاکره‌لردن سۉنگ دوحه‌گه قَیتگن و مذاکره‌لر بوگون قتر پایتختیده دوام اېته‌دی.
