بیرلشگن ملتلر تشکیلاتی‌نینگ باش کاتبی انتنیو گوتریش بیرلشگن ملتلر تشکیلاتی‌نینگ انسان حقوقلری بۉییچه عالي کمیساری باشقرمسی خادملریدن بیری‌نینگ حوثيلر تامانیدن حبسده سقلنه‌یاتگن پیتده وفات اېتگنینی معلوم قیلیب، گروه قۉلیده قاله‌یاتگن باشقه خادملرنی آزاد قیلیشگه چقیردی.
گوتریش بوگون (یک‌شنبه، ۱۰ عقرب) ایکس اجتماعي ترماغیده نشر قیلگن خبریده یمن نینگ فقراسی «محمد شامي» حوثيلر حبسیده وفات اېتگنینی ایتدی.
گوتریشنینگ سۉزلریگه کۉره، محمد شامي۲۰۲۴ـ ییل ۶-جوندن بېری حوثيلر تامانیدن حبسده سقلنگن و ایکّی ییلدن آرتیق وقت دوامیده هېچ قنده‌ی عیبلاو ایلگری سوریلمسدن همده عدالتلی محکمه جریانیسیز اوشلب توریلگن.
اونینگ قۉشیمچه قیلیشیچه، بو حوثيلر نینگ حبسخانه‌لریده بیرلشگن ملتلر تشکیلاتی‌نینگ خادملری نینگ وفات اېتیشی بیلن باغلیق ایکّینچی حالتدیر. بوندن اوّل هم بیرلشگن ملتلر تشکیلاتی‌نینگ جهان آزیق-طعام دستوریده‌گی خادملردن بیری ۲۰۲۵-ییلده حوثيلر حبسیده وفات اېتگن اېدی.
بیرلشگن ملتلر تشکیلاتی‌نینگ انسان حقوقلری بۉییچه عالي کمیساری تورک شامي عایله‌سی اونینگ وفاتیدن قریب بیر آی اۉتیب بو واقعه‌دن خبر تاپگنینی و حاضرگچه اونینگ اۉلیمی سببی همده شرایطلری حقیده هېچ قنده‌ی ایضاح آلمه‌گنینی معلوم قیلدی.
او حوثيلر حکومتیدن تۉلیق شفّافلیکنی تأمینلشنی و زودلیک بیلن مستقل همده هر تامانله‌مه تېرگاو اۉتکزیشنی طلب قیلدی. شونینگدېک، او اوشبو بیرلشگن ملتلر تشکیلاتی خادیمی نینگ عایله‌سی حقیقتنی بیلیشگه حقلی اېکنینی تأکیدله‌دی.
بیرلشگن ملتلر تشکیلاتی‌نینگ خادملری و یاردم تشکیلاتلری خادملرینی حبسگه آلیش ۲۰۲۴-ییلدن باشلب کوچه‌یگن. حوثيلر اۉشه ییل نینگ ۳۱-می و ۶-جون کونلری بیرلشگن ملتلر تشکیلاتی‌نینگ و نادولت تشکیلاتلری نینگ ۶۰ نفردن آرتیق خادیمینی حبسگه آلیب، اولرنی امریکا و اسرایل نینگ جاسوسلیک ترماغیگه اعضالیکده عیبله‌گن. بو عیبلاولرنی تصدیقلاوچی عامه‌گه آچیق و تېکشیریله‌دیگن دلیللر تقدیم اېتیلمه‌گن.
۲۰۲۵-ییل جنورییده هم کمیده سکّیز نفر بیرلشگن ملتلر تشکیلاتی‌نینگ خادیمی حبسگه آلینگن. اۉشه ییل اگوست آییده اېسه حبسگه آلیشلر نینگ ینگی تۉلقینی کوزه‌تیلگن. سۉنگگی حساباتلرگه کۉره، جمعی ۷۲ نفر بمت و نادولت تشکیلاتلری خادیمی حوثيلر حبسیده قالماقده.
حوثيلر حاضرگچه محمد شامي نینگ اۉلیمی حقیده ایضاح بېرمه‌گن. بیرلشگن ملتلر تشکیلاتی اونینگ بیلن بیرگه حبسگه آلینگن انسان حقوقلری بۉییچه عالي کمیسار باشقرمه‌سی نینگ ینه یېتّی نفر خادیمینی آزاد قیلیشگه چقیردی.
بیرلشگن ملتلر تشکیلاتی‌نینگ باش کاتبی شونده‌ی دېدی: «مېن هنوز بیرلشگن ملتلر تشکیلاتی‌نینگ عملده‌گی و سابق خادملری، شونینگدېک، حاضر هم [حوثيلر] حبسیده قاله‌یاتگن گومانیتار تشکیلاتلر همده فقرالیک جمعیتی انستیتوتلری خادملری نینگ خوفسیزلیگی و سلامتلیگیدن چوقور خواطرده‌من.»
