طالبلرنینگ تشقی ایشلر وزیرلیگی امریکا قۉشمه ایالتلریدن افغانستانلیک مهاجرلرنی پاکستانگه دېپورت قیلمسلیکنی، بلکه پُخته اۉیلنگن و مسوولیتلی یاندشوونی قۉللب، بو گروه بیلن بې‌واسطه کېلیشووگه اېریشیشنی سۉره‌دی.
طالبلرنینگ تشقی ایشلر وزیرلیگی بوگون (دوشنبه، ۱۱ عقرب) بیانات ترقه‌تیب، امریکا نینگ افغانستانلیک مهاجرلرنی پاکستانگه کۉچیریش حقیده‌گی قراری تۉغریسیده‌گی خبرلرگه مناسبت بیلدیردی.
وزیرلیک شونده‌ی دېگن: «اسلام امیرلیگی قۉشمه شتاتلردن بو باره‌ده مسوولیتلی و پُخته اۉیلنگن یاندشوونی قۉللشنی سۉره‌یدی. افغانستان وطنداشلری‌نینگ تقدیریگه عاید هر قنده‌ی قرار یاکه چاره شفّاف ایکّی تامانله‌مه کېلیشوو، ضرور موافقلشتیریش و منفعتدار شخصلر نینگ قانوني حقوق همده طلبلرینی چوقور حسابگه آلیش اساسیده عملگه آشیریلیشی لازم.»
طالبلر پاکستان نامینی تیلگه آلمه‌گن حالده، امریکا حکومتیدن افغانستانلیک مهاجرلرنی دېپورت قیلگن تقدیرده، اولرنی اوچینچی دولتگه یوبارمسلیکنی سۉردی. چونکه اوچینچی دولتلر مهاجرلردن سودالشوو واسطه‌سی صفتیده فایده‌لنیشی ممکن.
طالبلر نینگ تشقی ایشلر وزیرلیگی بیاناتیده شونده‌ی دېییله‌دی: «اوچینچی دولتلر نینگ باشقه بیر ملت وطنداشلری‌نینگ تقدیرینی قیسقه مدتلی و چېکلنگن امتیازلرگه اېگه بۉلیش یاکه باشقه سببلرگه کۉره سودالشوو واسطه‌سیگه ایلنتیریشی مناسب اېمس.»
طالبلر افغانستانلیک فقرالرنینگ مملکتگه شرَفلی، خوفسیز و اختیاري قَیتیشی یۉلیده «کانتروکتیف همکارلیک و ملاقات»گه تیارلیگینی بیلدیریب، اولر نینگ «حقوق و خوفسیزلیگینی تأمینلش»نی اۉز مسوولیتی دېب بیلیشینی ایتدی.
طالبلرنینگ تشقی ایشلر وزیرلیگی قۉشیمچه قیلیشیچه، بو گروه اۉزارا توشونیش اساسیده عملي همکارلیکنی باشلشگه تیار. بونده موجود واقعلیکلر همده هر ایکّی تامان‌نینگ قانوني تشویشلری حسابگه آلینه‌دی.
بو آره‌ده، اۉتگن هفته اَیریم امریکا عامه‌وي اخبارات واسطه‌لری و مهاجرلر حقوقلرینی حمایه قیلووچی تشکیلاتلر امریکا حکومتی افغانستانلیک مهاجرلرنی پاکستانگه دېپورت قیلیشنی رېجه‌لشتیره‌یاتگنی حقیده خبر بېرگن اېدی.
خبرلرگه کۉره، امریکاده باش‌پناه آلیشگه موفق بۉلمه‌گن ۱۵۰ کیشی افغانستانلیک مهاجردن عبارت دستلبکی گروه لویزیانا شتاتیده‌گی امریکا مهاجرت و باجخانه نظارتی خدمتی حبسخانه‌سیدن اسلامابادگه کۉچیریله‌دی. اگر بو رېجه عملگه آشسه، اوچینچی دولت صفتیده پاکستان افغانستانلیک مهاجرلرنی کابلگه یاکه تورخم چېگره‌سی آرقه‌لی قوروقلیکدن طالبلرگه تاپشیره‌دی.
