فرانسه ایچکی ایشلر وزیری لوران نونز بو مملکت افغانستانگه حجتسیز مهاجرلرنی چیقریب یوباریش مسأله‌سیده طالبلر رسميلری بیلن «تخنیکي ملاقات» آلیب باره‌یاتگنینی تصدیقله‌دی.
فرانسه ایچکی ایشلر وزیری تیناوون (دوشنبه، ۱۱ عقرب) مملکت پارلمانیده سۉزله‌گن نطقیده: «بیز ناقانوني یشش مقامیده بۉلگن افغانلر نینگ معلوم بیر قِسمینی قَیتریش امکانیتینی یره‌تیش اوستیده ایشله‌یه‌پمیز. بو تخنیکي مذاکره‌لردیر»، دېدی.
او قۉشیمچه قیلیب: «باشقه مملکتلر هم خودّی شونده‌ی ایش قیلماقده. مثلاً، آلمان هم بو ایشنی عملگه آشیرماقده»، دېدی.
لوران نونز نینگ ایتیشیچه، فرانسه‌ده‌گی افغان مهاجرلری‌نینگ «معلوم بیر قِسمی» جماعت ترتیبیگه تهدید سالیشی ممکن. «شو نینگ اوچون مېنینگ اوستوار وظیفه‌م بو شخصلرنی چیقریب یوباریشیمیز ممکنلیگیگه ایشانچ حاصل قیلیشدیر»، دېدی او.
فرانسه اخبارات آژانسی ایلک بار اکتوبر آیی باشلریده دیپلوماتیک منبعلرگه ته‌یه‌نیب، فرانسه حکومتی افغان مهاجرلرینی چیقریب یوباریش امکانیتلرینی آسانلشتیریش مقصدیده طالبلر بیلن مذاکره‌لرنی باشله‌گنی حقیده خبر بېرگن اېدی.
فرانسه ایچکی ایشلر وزیری مملکت پارلمانی اعضالری‌نینگ سواللریگه جوابن بو مذاکره‌لرنی تصدیقله‌دی.
پارلمان اعضاسی لېه لئا بالاژ حکومتنی بو حرکتی آرقه‌لی «انسانیتگه قرشی جنایتلر صادر اېته‌یاتگن رژیم بیلن دیپلوماتیک مناسبتلرنی نارمه‌للشتیریشنی باشله‌یاتگنلیکده» عیبله‌دی. او بو جنایتنی «جنسی آپارتاید» دېب اته‌دی.
فرانسه، آلمان، بلجیم و سویس کبی اروپا اتفاقی نینگ قریب ۲۰ ته اعضا دولتی بیلن بیرگه‌لیکده افغان مهاجرلرینی، خصوصاً، محکمه‌لر تامانیدن حکم قیلینگن شخصلرنی قَیتریش جریانینی تېزلشتیریشگه حرکت قیلماقده.
جاري ییل جون آییده اروپا اتفاقیگه اعضا قریب ۱۵ دولت وکیللری بروکسلده طالبلر هیئتی بیلن اوچره‌شیب، بو مسأله‌نی محاکمه قیلگن. طالبلر هیئتی اروپا کمیسیونسی‌نینگ تکلیفیگه بناءً بروکسلگه بارگن اېدی.
مذکور سفر کېنگ تنقیدلرگه سبب بۉلدی. انسان حقوقلری فعاللری اروپا اتفاقیگه اعضا دولتلرنی اۉز مجبوريتلرینی بوزیش و طالبلر بیلن مناسبتلرنی نارمه‌للشتیریشگه اورینیشده عیبله‌دیلر.
بیرلشگن ملتلر تشکیلاتی متخصلری اروپا اتفاقیگه اعضا دولتلردن مهاجرلرنی افغانستانگه چیقریب یوباریشنی توخته‌تیش و «مجبوري قَیترمسلیک تمایلی»گه رعایه قیلیشنی سۉره‌گن.
