ایران مجلسی رئیسی محمد باقر قالیباف امریکاده‌گی آره‌لیق سیلاولرده دموکرا‌تلرنینگ غلبه قازانگنیگه مناسبت بیلدیریب، امریکالیکلر اوروشگه «یۉق» دېگنینی ایتدی.
قالیباف ایکس اجتماعي ترماغیده‌گی صحیفه‌سیده: «بو وجدان طفیلیمی یاکه تورموش خرجتلری سببلیمی، امریکالیکلر اوروشگه یۉق دېدیلر»، دېب یازگن.
ایران نینگ امریکا بیلن تۉغریدن-تۉغری مذاکره‌لری جریانیگه رهبرلیک قیلگن قالیباف: «بیز بو خبرنی قۉللب-قوّتله‌یمیز»، دېب تأکیدله‌گن.
او دونالد ترامپ و بینیامین ناتنیاهو اۉرته‌سیده‌گی مستحکم مناسبتلرنی بې‌واسطه تیلگه آلمه‌گن حالده، جمهوریت‌چیلرنینگ سیلاوده‌گی مغلوبیتینی «حکومت نینگ خلق خواهشیگه خیانتی» و «تاولمچیلرگه تسلیم بۉلیشی» بیلن ایضاحله‌گن.
قالیباف شونده‌ی یازگن: «اگر امریکا حکومتی خلق‌ارا خۉجه‌یینلری و تاولمچیلرگه خدمت قیلیش اوچون اۉز خلقی‌نینگ خواهشیگه خیانت قیلسه، بیز نینگ «یۉق» دېگن جوابیمیز قنده‌ی دهشتلی عاقبتلرگه آلیب کېلیشینی انگلب یېته‌دی».
امریکاده‌گی آره‌لیق سیلاولرده آوازلرنی سنه‌ش جریانی دوام اېتماقده. حاضرچه دموکرا‌تلر سېناتده ۵۳ ته ا‌ۉریننی قۉلگه کیریتیب، کۉپچیلیکنی تأمینلش اوچون ضرور بۉلگن ۵۱ ا‌ۉرینلیک چېگره‌دن آشگن.
نماینده‌لر اعضالری سیلاو نتیجه‌لری حلی تۉلیق انیقلنمه‌گن. بیراق دستلبکی نتیجه‌لرگه کۉره، دموکرا‌تلر بو پله‌ته‌ده هم آلدینده بارماقده. اولر کتّه فرق بیلن ۱۹۵ ته ا‌ۉریننی قۉلگه کیریتگن بۉلسه، جمهوریت‌چیلر نینگ حاضرچه ۱۱۰ ته اۉرنی انیقلنگن.
دونالد ترامپ‌نینگ شخصي سیاستی، ایران اوروشی و امریکا نینگ ایرانگه هجومیدن سۉنگ هرمز بۉغازی نینگ یاپیلیشی آرتیدن یوزه‌گه کېلگن نرخ-نوا نینگ آشیشی امریکالیکلر نینگ کونده‌لیک حیاتیگه تأثیر کۉرسه‌تگن. بولر سیلاوچیلرنینگ قره‌شلری اۉزگریشیگه سبب بۉلگن اساسي عامللر صفتیده بهالنماقده.
